Од 30 мај до 1 јуни, Скопје пулсира во ритамот на „RhythmMк 2025 – Нов милениум во електрофизиологија и срцева електростимулација“, првиот интернационалниот симпозиум за аритмии во земјава. Ако денот по утрото се познава, тогаш првиот симпозиумски ден во хотелот „DoubleTree by Hilton“ најави одличен настан со бројни предавања и атрактивни теми на врвни предавачи од земјата и странство.
Овој симпозиум има за цел да ги обедини сите млади доктори, интернисти, кардиолози и медицински техничари кои имаат желба да се посветат на нарушувањата на срцевиот ритам од нашата држава, регионот и пошироко, и во тек на три дена да ги разменат сопствените искуства, дилеми, знаења, како и да црпат знаење од врвните аритмолози од регионот и светот, истакнуваат организаторите на симпозиумот од Работната група за аритмии и електростимулација при Македонското кардиолошко здружение.
RhythmMк 2025 стартуваше со ЕКГ-квиз наменет за младите доктори, каде преку анализа на различни ЕКГ-наоди и диференцијално-дијагностички дилеми од реални клинички сценарија, учесниците имаа можност да ги продлабочат своите знаења. Денешниот, втор ден е посветен на современите достигнувања и домашни искуства од областа на електростимулацијата и електрофизиологијата, а дел од програмата е и здружената сесија со Европската асоцијација за ритам и срце, на која специјален гостин ќе биде проф. Даниел Шер, претседател на Комитетот на национални здруженија за ритам.
Работењето со аритмии бара широки познавања од областа на медицината, кардиологијата, електротехниката, новите технологии за мониторирање и лекување на аритмиите
Во истиот ден учесниците имаат можност да ги следат и предавањата на еминентните експерти од областа на аритмологијата од Србија, Хрватска, Бугарија, Словенија, Италија, Германија, Романија и Австрија. На неколку пунктови се поставени и симулатори за електростимулација и електрофизиологија, што е можност за младите доктори за виртуална вежба – поставување електроди и катетри во срцевите шуплини и програмирање на апарати.
Во рамките на симпозиумот се предвидени и постер-презентации, а дел од младите учесници ќе имаат можност и орално да ги презентираат своите истражувачки проекти или интересни клинички случаи.
Аритмологијата како супспецијалност на кардиологијата се фокусира на дијагноза и третман на срцевите аритмии – нарушувања во срцевиот ритам
Главна цел на овој настан е да ги приближи младите лекари, специјализанти, кардиолози до срцевите аритмии и нивниот третман, преку интерактивни предавања, квизови и секако дружење, особено ако се има предвид дека аритмологијата како супспецијалност од кардиологијата бара голема посветеност, трпение и многу работни саати до постигнување на потребното ниво на знаење. Секој тип на нарушување на срцевиот ритам е уникатен и секое споделено искуство е бесценето, истакнуваат нашите аритмолози. (К.Ш.Д.)
