Вашето дете ја открива својата креативност и чувствува вистинска гордост кога неговите мали раце се вклучени во празничните ритуали — без разлика дали станува збор за вапсање јајцата или за воведување сосема нов семеен обичај. Силните семејни и социјални врски се столбот на нашето ментално здравје и благосостојба, а Велигден, со својата симболика на радост и заедништво, нуди совршена можност за продлабочување на тие врски со децата, со најблиските и со пријателите.
Семејните празнични традиции се прекрасен начин за заедничко поминување на времето, создавање позитивни спомени и градење чувство на семеен идентитет и припадност кај вашето дете. Семејните традиции, исто така, можат да им помогнат на децата да се чувствуваат поврзани со членовите на семејството кои веќе не се со вас, бидејќи тие се одличен начин за раскажување приказни за нив додека ја споделувате историјата на таа конкретна традиција.
Вклучете го детето во празничните подготовки. Дозволете му да ви помогне во печењето колачи, поставувањето украси или местењето на масата за празничниот оброк. Можеби ќе ви одземе малку повеќе време (а вашите колачи можеби нема да изгледаат совршено), но вашето дете ќе се чувствува гордо на својот придонес
Можете исто така заедно да создавате и нови празнични традиции. Вашето дете може да препознае дека е важен дел од семејството преку придонесот во ритуалите за кои е заинтересирано, а во кои ќе уживаат и идните генерации.
За да му помогнете на вашето дете да стекне подлабоко чувство на цел и припадност во овој празничен период:
- Вклучете го детето во празничните подготовки. Дозволете му да ви помогне во печењето колачи, поставувањето украси или местењето на масата за празничниот оброк. Можеби ќе ви одземе малку повеќе време (а вашите колачи можеби нема да изгледаат совршено), но вашето дете ќе се чувствува гордо на својот придонес.
- Објаснете го значењето зад традициите. Споделете ја историјата и причините зошто следите одредени традиции. Ова е особено важно за децата од различни етнички или религиозни средини. Истражувањата покажуваат дека кога децата имаат повисока самодоверба, тие посилно се идентификуваат со својот расен или етнички идентитет.
- Зборувајте за долгогодишните семејни традиции. Дали вашето семејство со генерации го дочекува Христовото воскресение на полноќ пред некоја од црквите? Додека сте вклучени во овие долготрајни семејни активности, споделете некои моменти од претходните прослави за да им помогнете на вашите деца да ја почувствуваат врската со минатото.
- Дозволете му на детето да даде свој личен печат на традициите. Иако Велигден е празник со длабоко вкоренети обичаи, секогаш има простор за детската фантазија. Наместо сите јајца да бидат вапсани на традиционален начин, оставете му на детето еден дел кој ќе го украси по своја желба — со налепници, фломастери, восочни боички или дури и со природни материјали што самото ги собрало. Можеби детето сака да направи „велигденско гнездо“ од трева во дворот или да одреди на кое место во домот ќе биде изложена празничната корпа.
- Прифатете нови традиции. Дали вашето дете минатата година уживаше во потрагата по скриени јајца во дворот или во паркот? Дали му се допадна идејата да подготвите посебен „велигденски појадок“ со забавни форми од храна? Празниците се жива материја и не мора да се ограничувате само на она што се правело со генерации. Разговарајте со вашето дете и откријте кои активности му донеле најмногу радост. Можеби тоа ќе биде заедничко гледање на одреден цртан филм по велигденскиот ручек, правење хуманитарни пакети за други деца или секојдневно наводнување на велигденската пченица. Кога заедно ќе одлучите кои од овие нови ритуали ќе станат „официјални“ за вашето семејство, вие му давате на детето моќ да ја обликува семејната историја. Тоа ќе биде многу поинспирирано да ги негува и старите обичаи ако знае дека во нив има место.
