Градот Струга, во периодот од 6 до 8 мај беше домаќин на долгоочекуваниот медицински настан од областа на неврологијата – симпозиумот „Новините во неврологијата, осврт на пандемијата и со кои насоки понатаму“, во организација на Македонското невролошко здружение (МНЗ), а во соработка со Медицинскиот факултет, Универзитет „Св. Кирил и Методиј“. На симпозиумот беа одржани 10 научни сесии и 9 стручни симпозиуми, а покрај домашни предавачи, предавања и активно учество имаа и врвни лекари од странство: Турција, Србија и Бугарија – сите заедно оставајќи траен белег на настанот кој обедини над 100 учесници и врвни предавачи од областа на неврологија од земјата и од странство.
Предавачите на симпозиумот пренесоа сериозна порака за висока тенденција на загрижувачки промени на најчестата патологија во неврологијата – мозочните удари кои имаат тенденција на пораст и зачестеност кај помлада популација од претходно, потреба од превенција, но и ран брз третман
„Од 6 до 8 мaj 2022 година, во хотел „Дрим“ во Струга се одржа вториот симпозиум „Новини во неврологијата“ посветен на постковид периодот, акредитиран од Македонското невролошко друштво. На овој едукативен медицински настан, со над 100 учесници и врвни предавачи од областа на неврологија, од нашата земја и од странство, а во организација на Македонското невролошко здружение (МНЗ), во соработка со Медицинскиот факултет, Универзитет „Св. Кирил и Методиј“, беа презентирани трудови со актуелни теми за третман и лекување на одделни невролошки заболувања“, истакнува проф. д-р Драгана Петровска-Цветковска, специјалист невролог (ЈЗУ Универзитетска клиника за неврологија) и Претседател на Македонското невролошко здружение.
На симпозиумот беа одржани 10 научни сесии и 9 стручни симпозиуми, а покрај наши предавачи, предавања и активно учество имаа врвни лекари од странство: Турција, Србија и Бугарија.
ГЛАВНИ ТЕМИ
„Главни теми на настанот беа ран третман на акутен исхемичен мозочен удар, превенција од цереброваскуларни болести, третман на мултипла склероза, ретки болести со акцент на спинална мускулна атрофија и невромиелитис оптика, епилепсии, Паркинсонова болест и болни синдроми. Се одржа и работилница за спинална мускулна атрофија, на која се презентираа повеќегодишни странски позитивни искуства, но и резултати од нашата земја за безбедноста и ефективноста на иновативните лекови за третман на оваа болест. Во оваа работилница освен реномирани доктори со мултидисциплинарен пристап, свое излагање имаа и пациентските здруженија, со што се направи мост на соработка и креиравме подобра иднина за нашите пациенти“, додава проф. д-р Петровска-Цветковска.
На симпозиумот се пренесе силна порака дека има пораст на новодијагностицирани пациенти со мултипла склероза и сродни невроимунолошки болести, со акцент на потребата од навремена дијагноза и ран третман со иновативни лекови кои се достапни во РСМ
Како што вели проф. д-р Петровска-Цветковска, Македонското невролошко здружение, повторно даде свое место и на овој симпозиум, со посебна сесија на младите невролози и научни истражувачи да споделат искуства, рамо до рамо со своите професори, со што ја продолжија својата традиција да даваат поддршка на младите во нивното научно воздигнување.
СЕРИОЗНА ПОРАКА ЗА ВИСОКА ТЕНДЕНЦИЈА НА ЗАГРИЖУВАЧКИ ПРОМЕНИ НА НАЈЧЕСТАТА ПАТОЛОГИЈА ВО НЕВРОЛОГИЈАТА – МОЗОЧНИТЕ УДАРИ И ПОРАСТ НА НОВОДИЈАГНОСТИЦИРАНИ ПАЦИЕНТИ СО МУЛТИПЛА СКЛЕРОЗА
„Предавачите на симпозиумот пренесоа сериозна порака за висока тенденција на загрижувачки промени на најчестата патологија во неврологијата – мозочните удари кои имаат тенденција на пораст и зачестеност кај помлада популација од претходно, потреба од превенција, но и ран брз третман кој бара обединување и поголема соработка со регионалните центри и болници. Воедно се пренесе силна порака дека има пораст на новодијагностицирани пациенти со мултипла склероза и сродни невроимунолошки болести, со акцент на потребата од навремена дијагноза и ран третман со иновативни лекови кои се достапни во РСМ.“
ОДРЖАНО И ГЕНЕРАЛНО СОБРАНИЕ НА МНЗ
„На крајот од симпозиумот се одржа Генерално собрание на МНЗ со споделен извештај за работата на Здружението за тековната 2021 година, при што беше споделено дека онлајн се организирани шест акредитирани стручни состаноци, VII Конгрес на Македонско невролошко здружение и медицински сестри 7-9 Мај 2021, како и првиот симпозиум „Новини во неврологија, Ковид и постковид пандемичен период, консеквенци и следење на невролошките импликации“, одржан 5-7 ноември 2021 год. На крајот од симпозиумот учесниците си посакаа во добро здравје скорешни нови настани во живо, во убава атмосфера со желба за надградување на знаењата и меѓусебна размена на научните и стручни искуства“, додаде проф. д-р Петровска-Цветковска, претседател на Македонското невролошко здружение, споделувајќи ги впечатоците од неодамна завршениот успешно организиран втор симпозиум „Новини во неврологијата“ посветен на постковид периодот.
