Од 18 до 21 мај во хотелот „Doubletree by Hilton“ во Скопје се одржа 5. Конгрес и 25. Симпозиум со меѓународно учество на Здружението на лекари по општа-семејна медицина (ЗЛОМ-СМ). Вистински празник во областа на медицината се случуваше во главниот град со богата и прецизно подготвена програма, распоредена во четири денови, посветени на хроничните незаразни заболувања во постковид пандемија и ургентните состојби во семејната медицина, обработени во рамки на Симпозиумот.
„На Конгресот имаше регистрирано околу 450 учесници, 16 европски професори и 12 македонски професори, како и голем број на семејни доктори, кои одржаа предавања распределени во десет сесии за кардиоваскуларните заболувања, хематолошките заболувања, респираторните, ендокринолошките, лонг ковид во интернистичките гранки, во неврологија и дерматовенерологија, како и слободни теми. Беа презентирани 41 орална презентација и 31 постер презентација. Учество земаа преку 30 фармацевтски компании, дел од нив имаа 15 сателитски симпозиуми.
Ме радува фактот што на овогодинешниот конгрес гледам и голем број на млади колеги, а дел од нив презентираа интересни случаи од нивната пракса. Конгресот имаше и четири работилници – две за ургентни состојби во семејната медицина, една за дерматоскопија и една за намалување на кардиоваскуларниот ризик кај пациентите со дијабет тип 2. Значајно беше и одбележувањето на Денот на семејниот лекар – 19 Мај со фрлање на балони во воздухот во кои испративме порака до здравствените власти“, истакна д-р сци. Драган Ѓорѓиевски, претседател на ЗЛОМ-СМ, по завршувањето на Конгресот и Симпозиумот.
Д-р сци. Ѓорѓиевски не го криеше задоволството од успешно организираниот настан. „Конгресот ги помести границите во организирањето на конгреси во нашата земја и слободно можам да кажам дека го достигна светското ниво на организирање конгреси токму онаму каде што посакуваме да ја видиме примарната здравствена заштита и семејната медицина“, рече д-р сци. Ѓорѓиевски.
Семејните лекари се срцето на здравствената заштита – 5. Конгрес и 25. Симпозиум со меѓународно учество на Здружението на лекари по општа-семејна медицина (ЗЛОМ-СМ) поминаа во прекрасна атмосфера во која покрај работниот дел учесниците и гостите имаа и можност за дружење и опуштање за време на свечената вечера и забава по повод одржувањето на големиот настан.
Уште долго ќе се зборува за 5. Конгрес и 25. Симпозиум со меѓународно учество на (ЗЛОМ-СМ), кој навистина ги помести границите покажувајќи дека и во Македонија може да се организираат врвни настани од ваков тип. (К.Ш.Д.)
