Шведска воведе револуционерен закон на почетокот на јули, кој им дозволува на бабите и дедовците да им помагаат на своите деца и да добиваат надомест за чување на нивните внуци до три месеци во текот на првата година од животот.
Според законот, родителите можат да префрлат дел од надоместокот што го добиваат како дел од родителското отсуство на бабата и дедото на детето. Родителскиот пар може да пренесе најмногу 45 дена на други, додека самохран родител може да пренесе 90 дена.
Родителите во Шведска имаат право на 480 дена или 16 месеци отсуство по раѓањето на детето. За првите 390 дена се исплаќа надоместок врз основа на приходите на лицето, додека за останатите 90 дена се плаќа фиксен износ од 15,32 евра по ден.
Постојат и други бенефиции за родителите во Шведска, како што е скратено работно време додека детето не наполни осум години или додека детето не наполни дванаесет години за државните службеници. Инаку, Шведска беше прва во светот која пред 50 години воведе платено родителско отсуство и за татковците, а не само за мајките.
