♦♦♦♦♦♦♦
Уредите за климатизација кои кружат ист воздух во просторијата треба да бидат исклучени или користени со отворени прозорци за да се запре преносот преку воздух на COVID-19, тврдат експертите.
Британските истражувачи објаснуваат дека луѓето кои користат климатизери кои го вртат истиот воздух се изложени на зголемен ризик од заразување со COVID-19 доколку заразено лице било во истиот простор.
Според британски „Телеграф“, постојат два типа на климатизери – оние што земаат воздух однадвор и го изнесуваат повторно надвор и сплит-системи, кои го ре-циркулираат истиот воздух.
Д-р Шон Фицџералд од „Royal Academy of Engineering“ вели дека отворањето прозорец додека е вклучен клима уредот може да биде најдобриот начин за намалување на ризикот.
„Препорачаната стратегија сега, доколку имате една од оние сплит-единици е да го отворите прозорецот и да ја жртвувате вашата желба за ладно или поладно опкружување. Ако не можете да отворите прозорец, тогаш исклучете ја климатизацијата“, вели Фицџералд.
Истражувачите уште во април го обвинија системот за климатизација за ширењето на коронавирус меѓу најмалку девет други лица кои јаделе во ресторан во Гуангжу, Кина, во јануари. (Дејли мејл)
