Најмалку 260 ученици и осум наставници од една училишна област во Атланта, Џорџија, САД, се ставени во карантин, откако повеќе ученици и наставници се тестирани позитивно на COVID-19 во текот на првата недела од почетокот на училишната настава, пренесува Си-Ен-Ен.
Училишниот округ „Cherokee County“ пријави позитивни случаи кај најмалку 11 ученици и двајца членови на училишниот персонал. Учениците и вработените кои биле изложени на позитивен случај се ставени во карантин две недели.
Учениците кои во моментов се во карантин ќе добиваат инструкции преку интернет додека се дома
Од училиштето порачуваат дека ќе ги преземат сите чекори за што е можно потранспарентно известување за вкупниот број на позитивни случаи секоја недела.
„Знаеме дека сме под микроскоп бидејќи националните медиуми го следат повторното отворање на училиштата низ целата земја“, изјави д-р Брајан В. Хајтауер, директор на училиштето. „Но, знајте дека нашите одлуки не се засноваат на она што мислат луѓето во Њујорк или Канзас, ниту пак сме загрижени за „имиџот“. Фокусирани сме на тоа да го направиме она што е најдобро за нашата заедница“, додаде тој.
