„Одиме во лов на мечка! Ќе фатиме голема!“
Вака некако оди популарната детска приказна која деновиве се одвива во живо на улиците во Нов Зеланд. За што всушност се работи?
♦♦♦♦♦♦♦
Комплетното затворање на државата како последица на коронавирусот Ковид-19 не ги запре заедниците да работат заедно за да ги забавуваат своите деца.
И додека луѓето не можат да комуницираат непосредно едни со други, тие може да одат на прошетки како семејство. Домаќинствата почнаа да ставаат кадифени мечиња на предните прозорци на своите домови така што кога другите деца ќе одат на прошетка со семејството, ќе можат да се забавуваат броејќи ги мечињата што ги забележале, се разбира, се додека се држат до препораките на властите.
Мајка на двегодишно дете изјави дека е супер што може секој ден да го одведе детето во авантура.
„Знаете како е со децата, тие секогаш бараат авантури, а кое дете не ја сака книгата „Одење во лов на мечка“? Мислам дека ова им носи малку радост во денот и затоа ќе продолжам да го носам мојот син надвор секој ден. Особено со двегодишник, тој не разбира што се случува во моментот. Сакаме да се обидеме да функционираме колку што можеме понормално и без стрес. Луѓето можат да одат на прошетки со своите деца, но ние сакаме да биде малку повозбудливо, повеќе како авантура“, вели мајката за тамошните медиуми.
„Ловот на мечиња“ полека се шири низ цел Нов Зеланд како начин за забава на децата за време на фамилијарните прошетки.
Премиерката на Нов Зеланд Џасинда Арден ја поздрави идејата за лов на мечиња. „Барајте мечиња на прозорците, но Ве молам додека се разминувате задржете го растојанието, не зборувајте со другите и останете во рамките на вашата заедница“, апелираше Арден.
„И ако сте во Велингтон и одите во соседството, можеби ќе забележите едно мече и на мојот прозорец“, додаде Арден.
