Вонредните ситуации бараат вонредни мерки, како што е моменталната состојба со коронавирусот, која неминовно изискува носење на заштитни маски.
Сите имаме секогаш заштитни маски со нас, а не се исклучок ниту возачите, од кои добар дел ги чуваат маските најчесто закачени на ретровизорите во автомобилите. Тоа не се прави само кај нас, туку е пракса низ целиот свет. Меѓутоа, експертите за безбедност во германската компанија „Декра“ предупредуваат на неколку причини поради кои маската не би смееле да ја чуваме на ова популарно место.
„Дури и мали приврзоци на ретровизорот како што се освежувачи на воздухот според наше мислење можат да бидат опасни“, вели Питер Рукер, раководител на истражувањето на несреќи во „Декра“. „Кога станува збор за маските, тие можат да бидат уште поопасни бидејќи се поголеми. Не се работи само за тоа дека видното поле на возачот е ограничено, особено при вртење, туку и дека маските го одвлекуваат вниманието“.
Воглавно секогаш има некој предмет што виси околу ретровизорот, возачите мора да се навикнат на движења на работ на видното поле. Но, поради ова, тие многу подоцна забележуваат движења надвор од возилото, како што се велосипедисти или пешаци од десната страна на патот, а тоа може да предизвика голем број несреќи, кои всушност, би можеле да се избегнат.
Совет на стручњаците е маската да се чува во предната фиока во автомобилот и да не ги загрозуваме останатите учесници во сообраќајот.
