Водечкиот кинески експерт тврди дека првите вакцини против COVID-19 во Кина би можеле да бидат готови за употреба уште наесен
♦♦♦♦♦♦♦
Д-р Џонг Наншан, кој беше назначен да ја предводи борбата на земјата против COVID-19, во саботата изјави дека пандемијата на коронавирус треба да се решава со масовна вакцинација, а не со колективен имунитет.
„Една земја треба да има 60 до 70 проценти заразено од своето население за да има колективен имунитет. Ако е така, седум проценти од нив би умреле од болеста“, изјави д-р Џонг.
Медицинскиот експерт додаде дека ваквиот пристап би можел да резултира со смрт на 30 до 40 милиони луѓе, без да прецизира како дошол до бројките.
„Тоа е шокантно. Премногу е скапо“, додаде тој.
83-годишниот експерт за коронавирус откри дека некои вакцини што ги развиле кинеските научници би можеле да бидат подготвени веќе наесен за „итна употреба“.
Тој додаде: „Некои од нив може да се користат за итни случаи, можеби до крајот на оваа година. Веруваме дека тоа ќе биде наесен или во зима годинава“.
Кина во моментот тестира најмалку пет различни типови вакцини против COVID-19, според извештајот објавен од страна на централната влада во неделата.
