Состојбата со епидемијата на мали сипаници во земјава не стивнува. Регистрирани се 105 нови случаи на морбили, а досега се вакцинирани 27.000 лица низ државата.
„Заклучно со денешниот ден се регистрирани вкупно 105 нови случаи на морбили, од кои 49 во Скопје, а 56 во другите градови низ државата. Вкупно досега со ова заболување се регистрирани 1.625 пациенти. Ова е најголема бројка на заболени од морбили во последните 25 години“, изјави д-р Жарко Караџовски од Институтот за јавно здравје, член на Комисијата за заразни болести во рамки на Министерството за здравство.
Д-р Караџовски објасни дека во однос на најновите 105 случаи, 77,1% од нив се невакцинирани лица, вакцинирани само со една доза или лица за кои воопшто нема податок за вакцинален статус.
„Досега вкупно 27.000 лица се вакцинирани од почетокот на епидемијата, меѓутоа уште 15.600 лица се подложни на вакцинација, чувствителни на вирусот, а досега не се вакцинирани. Токму затоа, како епидемиолог, апелирам да се продолжи со вакцинацијата“, додаде д-р Караџовски.
Од медицинскиот персонал, пак, досега се вакцинирани вкупно 1.246 здравствени работници. (К.Ш.Д.)
