Колку пати сте слушнале дека децата единци се себични, пребирливи, „прерано возрасни“, арогантни и слично? Денес сè повеќе семејства имаат само едно дете, а причините се различни – понекогаш работа, понекогаш финансии, а понекогаш едноставно одлука на родителите. Но, да се биде единец не значи дека детето е лишено од нешто, ниту дека ќе израсне во неемпатична и себична личност. Напротив – децата единци често развиваат прекрасни особини кои им помагаат низ целиот живот.
Во продолжение ви претставуваме 6 позитивни карактеристики на децата единци за кои ретко се зборува, а кои често се изразени кај децата кои растат без брат или сестра:
1. Знаат да бидат и сами и во друштво
Единците никогаш не им е здодевно кога се сами – умеат да си измислат игра, да се забавуваат, да цртаат, да сонуваат. А сепак, преку градинка, училиште и дружење, создаваат пријателства. Осаменоста не е нивна приказна.
2. Пријателите им се како семејство
Единците често градат длабоки пријателства и остануваат верни на тие односи. Тоа се оние пријатели што ќе ви тропнат на врата и кога е убаво – и кога е тешко.
3. Независни од најмала возраст
Нема постар брат или сестра што ќе го реши проблемот? Нема проблем – единецот ќе се снајде сам. Затоа често се самостојни, практични и сигурни во себе.
4. Мали големи говорници
Бидејќи повеќе време поминуваат со возрасни, единците рано учат како да се изразат, да поставуваат прашања и да бараат одговори. Подоцна, ова им помага и во училиштето и во животот.
5. Љубопитни истражувачи
Родителите на единци често имаат повеќе време и енергија да им се посветат, па детето има можност да проба разни активности – од спорт до хоби. Единците се отворени, љубопитни и желни за нови искуства.
6. Како и секое друго дете
На крајот на денот, единците се деца – како и сите други. Нивниот карактер не зависи од тоа дали имаат брат или сестра, туку од љубовта и поддршката што ја добиваат дома.
Митовите се тука за да се рушат. Единците не се ни разгалени, ни осамени. Тие се едноставно – деца. И како сите деца, најдобро растат кога чувствуваат љубов, сигурност и топлина во својот дом. Вистината е едноставна: среќни родители одгледуваат среќни деца.
