Малата Ива, предвремено родено бебе во 26. гестациска недела, со екстремно мала тежина од само 700 грама, по 74 дена поминати на Универзитетската клиника за гинекологија и акушерство – Скопје, ја напушти Клиниката, а неонатолошките интензивни одделенија ги замени со топлината на семејниот дом.
„Предвремено роденото бебе Ива на 18 март замина дома во добра општа состојба и со уреден наод на виталните функции“, информираат од ГАК-Скопје на својот ФБ профил. Оттаму додаваат дека трудницата која е прворотка била хоспитализирана на Клиниката на 27.12.2021 година, бременоста и била оптоварена со повеќе ризици, а породувањето било извршено спонтано.
„Бебето беше родено на 04.01.2022 година, предвремено во 26. гестациска недела, со екстремно мала тежина од само 700 грама, со должина од 28 сантиметри и со апгар 3/5/5. На 18.03.2022 година од Клиниката за гинекологија и акушерство беше испишано со 2200 грама телесна тежина. Во периодот на престој на нашите одделенија, новороденото имаше комплексен третман. Во интензивниот третман применета е механичка вентилациона поддршка во првите 21 ден од раѓањето. Потоа новороденото беше ставено на кислородна поддршка со неагресивна механичка вентилација до 67-от постнатален ден, со постојан мониторинг на виталните функции и кислородна заситеност со пилсоксиметрија и гасни анализи“, објаснуваат од ГАК.
На бебето му се направени сите скрининзи кои се пропишани во Националната програма на Министерството за здравство и е испратено од ГАК со прецизни поуки за контрола и за следење на растот и на развојот.
Новороденото е испишано во добра општа состојба, со пораст на телесната маса, стабилно и витално. Малата Ива е вистински херој, за кој деноноќно се грижеше тим на педијатри/неонатолози, медицински сестри и акушерки од ЈЗУ Клиника за гинекологија и акушерство – Скопје. Уште една добиена битка на ГАК, уште една убава вест, позитив на денот!
