ПИШУВА:
Катерина Шекеровска-Димовска
katerina@pedijatar.mk
„Медицината динамично се развива. Најважно е да ги следиме трендовите, најновите препораки за третман и да ги имплементираме во нашето секојдневие. Во последните неколку години со презентирање на нашите искуства на светските конгреси успеавме Универзитетската клиника за пластична и реконструктивна хирургија да биде препознаена како референтен центар во регионот и пошироко“, вели доц. д-р Софија Пејкова, специјалист по општа хирургија, супспецијалист по пластична и реконструктивна хирургијa и директорка на Универзитетската клиника за пластична и реконструктивна хирургија. Доц. д-р Пејкова ќе биде дел од претстојниот симпозиум „Современата хирургија, предизвик и потреба“ (11-13 март), во организација на Здружението на доктори „Хирурзи на Југоисточна Европа“, што е одлична можност за споделување на искуства и унапредување на меѓусебната соработка.
Ја поздравувам иницијативата на здружението на доктори „Хирурзи на Југоисточна Европа“ и претседателот на Здружението д-р Илбер Бесими за организација на овој симпозиум на кој ние хирурзите од нашата држава заедно со колегите од регионот ќе имаме можност да ги споделиме нашите искуства и да дискутираме на различни теми од хирургијата
Од 11 до 13 март 2022 година во земјава ќе се одржи симпозиум со работен наслов „Современата хирургија, предизвик и потреба“, кој ќе биде со меѓународно учество. Настанот е во организација на Здружението на доктори „Хирурзи на Југоисточна Европа“ и на него после подолго време хирурзите во нашата држава, како и колегите хирурзи од регионот ќе имаат можност да споделат искуства, да се запознаат и на тој начин да ја унапредат меѓусебната соработка, се во служба на доброто за пациентот. Ќе ја водите сесијата за пластична и реконструктивна хирургија, истовремено ќе имате и предавање. Кои се клучните теми на сесијата?
Доц. д-р Пејкова: Ја поздравувам иницијативата на здружението на доктори „Хирурзи на Југоисточна Европа“ и претседателот на Здружението д-р Илбер Бесими за организација на овој симпозиум на кој ние хирурзите од нашата држава заедно со колегите од регионот ќе имаме можност да ги споделиме нашите искуства и да дискутираме на различни теми од хирургијата. Хирургијата е мултидисциплинарна област и токму на овој симпозиум ќе имаат можност да учествуваат хирурзи од различни супспецијалности и меѓусебно да ги разменат своите искуства. На сесијата за пластична и реконструктивна хирургија на симпозиумот ќе бидат презентирани нашите искуства од примената на реконструктивни техники кои ги следат светските трендови и иновации кои се воведени во нашата област.
Бевте дел од тимот кој во изминатата година (првата реплантација на десната надлактица во Македонија е изведена уште во далечната 1976 година, од страна на д-р Андреја Мишковски, хирург по пластична и реконструктивна хирургија) после долги години на Универзитетската клиника за пластична и реконструктивна хирургија, направи реплантација на десната подлактица кај 54-годишен пациент, кој се повредил додека ракувал со моторна пила. Овие интервенции спаѓаат меѓу најкомплексните, со многу куса временска рамка за делување. Каков предизвик, всушност, беше ова за Вас и воопшто за екипата која ја изведе интервенцијата?
Доц. д-р Пејкова: Беше голем предизвик да се изведе оваа комплексна хируршка интервенција. Бевме во битка со пациент шокиран од екстензивната повреда, комплетно ампутирана подлактица и неопходноста од итно започнување на операцијата за реплантација. Во рекордно време беше формиран тим од хирурзи од повеќе специјалности, вклучувајќи пластични хирурзи, трауматолог, васкуларен хирург, анестезиолог и искусни медицински сестри инструментарки.
Медицината динамично се развива. Најважно е да ги следиме трендовите, најновите препораки за третман и да ги имплементираме во нашето секојдневие
Реплантацијата на екстремитет е една од најкомплицираните хируршки процедури воопшто. Опфаќа реконструкција на сите ткива, почнувајќи од коските, анастомозирање на венски и артериски крвни садови, реконструкција на нервите на екстремитетот, поправка на мускулно-тетивниот апарат, кој на подлактицата опфаќа 20 мускули и уште повеќе тетиви, како и реконструкција на кожната покривка. Оваа искучително комплексна операција е само доказ дека тимската координирана работа секогаш носи успех. Благодарение на исклучителниот тим за реплантација и персоналот на нашата клиника операцијата беше успешна, како и нашата цел пациентот да добие функционален екстремитет.
Реплантацијата на екстремитет е една од најкомплицираните хируршки процедури воопшто. Опфаќа реконструкција на сите ткива, почнувајќи од коските, анастомозирање на венски и артериски крвни садови, реконструкција на нервите на екстремитетот, поправка на мускулно-тетивниот апарат, кој на подлактицата опфаќа 20 мускули и уште повеќе тетиви, како и реконструкција на кожната покривка
Кои интервенци се најчести на Клиниката за пластична и реконструктивна хирургија?
Доц. д-р Пејкова: Клиниката за пластична хирургија ги следи светските и европски трендови на развојот на науката и медицината. Секојдневно се работи активно за да се одговори на потребите на пациентите за третман и на најкомплицирани болести и состојби со што би се добило квалитетно лекување во земјава наместо во странство. Универзитетската клиника за пластична и реконструктивна хирургија опфаќа и третира широк распон на болести, кожни карциноми, мекоткивни тумори, повреди на шака, изгореници, реконструкција на дојка, реконструкција на нерви итн.
Пластичната хирургија е област од хирургијата која се занимава со уникатни реконструктивни техники насочени кон враќање на формата и функцијата, а не само на еден систем или анатомска регија.
Уште поголем предизвик за нас пластичните хирурзи е што се занимаваме со третман на повреди, аномалии, компликации по повреди на шаката. Хирургијата на шака е дел од пластичната и реконструктивна хирургија и кога ќе погледнеме подетално во оваа област всушност влегуваат скоро сите процедури од пластичната и реконструктивна хирургија-реконструктивни техники за репарација на тетиви, микрохируршки техники за анастомози на крвни садови, микрохируршки процедури за реконструкција на нерви, реконструктивни техники за покривање на кожни дефекти.
Вие сте посветен хирург, но и актуелна директорка на Универзитетската клиника за пластична и реконструктивна хирургија. Какви се Вашите професионални планови понатаму?
Доц. д-р Пејкова: Медицината динамично се развива. Најважно е да ги следиме трендовите, најновите препораки за третман и да ги имплементираме во нашето секојдневие. Во последните неколку години со презентирање на нашите искуства на светските конгреси успеавме Универзитетската клиника за пластична и реконструктивна хирургија да биде препознаена како референтен центар во регионот и пошироко. Од особена важност е нашата повеќегодишна соработка со Медицинскиот универзитет Виена и со поддршка на проф. д-р Оскар Азман имаме можност за едукација, консултации кога ни е потребна неговата експертиза како и воведување на нови методи од нашата област. Како визитинг професор на Медицинскиот факултет во Скопје, тој редовно одржува предавања за нашите студенти и специјализанти. Во текот на оваа година двајца специјализанти дел од турнусот по микрохиргија ќе го поминат на Универзитетската клиника за пластична хирургија, Упсала, Шведска.
Иднината ја гледам во младите колеги кои сега станаа специјалисти пластични хирурзи или се на крај од специјализицијата. Верувам во нивните способности, ентузијазам, знаење и истрајност – особини кои треба да ги поседува еден пластичен хирург кој се занимава со реконструктивна микрохирургија.
Што Ве води во работата и односот кон пациентите? Дали и колку успевате да делувате според сопственото мото: „Oднесувајте се кон пациентот, како што вие би сакале да се однесува лекарот кон вас кога би биле пациент“?
Доц. д-р Пејкова: Емпатијата, а тоа значи за миг ние лекарите да се ставиме на местото на пациентот кој е пред нас, да помислиме како се чувствува и низ што поминува. Секој пациент е посебна личност и со него треба да се изгради однос базиран на меѓусебна почит, доверба и лојалност. Ние го лекуваме пациентот кој има болест, а не само болеста. Целта на секој лекар е добро прифатен пациент, успешно лекуван и излекуван.
