ПИШУВА:
Катерина Шекеровска-Димовска
katerina@pedijatar.mk
Од 11 до 13 март 2022 година, на виртуелна (онлајн) платформа ќе се одржи симпозиум со работен наслов „Современата хирургија, предизвик и потреба“, кој ќе биде со меѓународно учество. Симпозиумот е во организација на Здружението на доктори „ХИРУРЗИ НА ЈУГОИСТОЧНА ЕВРОПА“ и е посветен на хирурзите, но и на сродните медицински гранки чии области се испреплетуваат во секојдневната пракса со хирушката дејност. За сите детали, теми, цел и други поединости поврзани со претстојниот настан разговаравме со aсс. д-р Иљбер Бесими, претседател на Здружението на доктори „ХИРУРЗИ НА ЈУГОИСТОЧНА ЕВРОПА“, специјалист хирург, супспецијалист по трауматологија, магистер за менаџмет на хумани ресурси, доктор на медицински науки, област хирургија, заменик на претседателот на Лекарска комора на Република Северна Македонија и шеф на Одделот за хирургија и трауматологија, Клиничка болница Тетово.
„Современата хирургија, предизвик и потреба“ е работниот наслов на претстојниот симпозиум, кој е во организација на Здружението на доктори „ХИРУРЗИ НА ЈУГОИСТОЧНА ЕВРОПА“, а ќе се одржи од 11 до 13 март 2022 година, на виртуелна (онлајн) платформа и ќе биде со меѓународно учество. Општ е впечатокот дека недостасуваат вакви стручни настани од областа на хирургијата, на кои ќе се разговара на повеќе теми, ќе се разјаснат одредени дилеми и ќе се зацврсне меѓусебната соработка, која е повеќе од потреба и нужна, а се со цел доброто на пациентот.
Асс. д-р Бесими: Симпозиумот е посветен на хирурзите, но и на сродните медицински гранки чии области се испреплетуваат во секојдневата пракса со хирушката дејност. Симпозиумот произлезе како форум на споделување на хируршкото делување и сродните области, а ќе биде организиран за да се начнат многу теми и истите да доведат до последователно разрешување на некои дилеми во хирургијата, како и можност за размена на искуства за најновите научни и професионални достигнувања во хирургијата. Целта на овој настан е после долго време хирурзите во нашата држава, како и колегите хирурзи од регионот да споделат меѓусебни искуства, да се запознаат и се со една заедничка цел за подобрување на меѓусебната соработка и размена на искуствата. Овие размени на искуства се неминовни за развој на современата научна мисла, а тоа преставува една многу битна нишка на нашите дејанија.
Здружението на хирурзите на Југоисточна Европа има за цел оваа групација на експерти од хируршката дејност како и колегите кои се заедно со нас во екипата на секојдневното работење во современата медицина да ги сплотиме, да направиме мрежа на комуникација и споделување на искуства, афирмација на хирургијата и хируршката дејност во општеството
Каков е концентот на симпозиумот и кои се темите на кои ќе се дискутира?
Асс. д-р Бесими: Симпозиумот е составен од сесии од повеќе области, на кои учество ќе земат домашни и меѓународни експерти, сателитски симпозиуми посветени на одредена тема, усни и постер презентации, како и видеопрезентации од областа на хирургијата.
Темите кои ќе се обработат на симпозиумот по област се хирургии: општа, ургентна, дигестивна, детска, градна, васкуларна и пластично-реконструктивна, потоа трауматологија, неврохирургија, урологија, ортопедија, анестезија и реанимација, интензивно лекување, болка и менаџмент на болка, дијагностицирање, предоперативна подготовка и индукциона терапија.
Се надевам дека нашата меѓусебна соработка ќе го подобри квалитетот на нашето
работење и квалитетот на здравствената услуга која ние ја даваме на нашите пациенти.
Симпозиумот доаѓа после подолга пауза на активностите на хирурзите. Зошто токму сега?
Асс. д-р Бесими: Согледувајќи ги досегашниот период на дејствување на хирурзите во нашата држава, а во исто време и во регионот, како и нашата неактивност во земјава со некревање на гласот на нашата стручност и важност на дејноста, општо познато во медицината е дека хирургијата се смета како кралица на медицината, следејќи ги општествените движења на глобално ниво, олеснувањето на комуникацијата со современите технолошки средства, во исто време поучени од оваа пандемија, во комуникација со колеги сметавме дека хирурзите и хируршката дејност како и нашите колеги кои како тим сочинуваме ефикасна и делотворна мултидисциплинарна екипа за решавање на можеби најкомплицираните состојби во медицината, сметавме дека е време како хирурзи и претставници на хирушката дејност да ја претставиме „кралицата“ во најдобро светло, првин со наша меѓусебна комуникација и запознавање, во земјава и во регионот и исто така во општеството, бидејќи мнението на хирургот е важна алка во здравствениот систем.
Која е мисијата?
Асс. д-р Бесими: Хирурзите како лекари од разни супспецијалности и специфики на хирушката дејност се познати по својот карактер на лица со експлицитна и ефективна мисла и дејствување, свесни за важноста на нашето дејствие, а посебно за огромната одговорност која ја држиме на наши рамена, како тим лидери на комплексната медицинска екипа сметаме дека ние како хирурзи треба да се организираме, комуницираме, дејствуваме и едуцираме заедно со споделување на нашите искуства, новини, техники и преспективи. На крај на краиштата само хирург може да разбере хирург најдобро, а најдоброто се постигнува во тим и со соработка која ние веќе ја гледаме регионално и глобално како граѓани на светот и како посебни луѓе на светската популација.
Како претседател на Здружението на доктори „ХИРУРЗИ НА ЈУГОИСТОЧНА ЕВРОПА“, Кои се Вашите понатамошни планови за чија реализација ќе се залагате, која е Вашата цел?
Господ ги дарил хирурзите со рака на уметник, со сила на ковач и ум на мудрец
Асс. д-р Бесими: Здружението на хирурзите на Југоисточна Европа има за цел оваа групација на експерти од хирушката дејност како и колегите кои се заедно со нас во екипата на секојдневното работење во современата медицина да ги сплотиме, да направиме мрежа на комуникација и споделување на искуства, афирмација на хирургијата и хируршката дејност во опшеството се со цел нашето место, помалку подзаборавено од општеството, да го вратиме на пиедесталот кој го заслужува, да овозможиме на нашите помлади колеги квалитетна и современа едукација, оформување на современи програми и гранки на специјализации, стекнување на вештини и квалификации во рамките на последните научни сознанија во хирургијата.
За крај, како прв човек на хирурзите и нивен „адвокат“, имате ли некаква порака која би сакале да ја споделите со јавноста?
Асс. д-р Бесими: Спознавање на нашите недостатоци, осознавање на потребите на хирургијата во насока на движење кон осовременување и усовршување, да се креира квалитетни хирушки кадар кој би одговорил на секој предизвик во хирургијата, нашата порака до целото општество би била да се осознае работата на хирургијата како една од најбитни медицински гранки. Тука би цитирал еден мој професор: „Само хирургија е медицина, се друго е судбина“, така што вложувањето во хирургија и во хируршки кадар е вложување во здраво и квалитетно општество и карактеристика на развој на цивилизацијата во целина. Хирушката дејност како таква треба да се слушне, да се послуша и да се разбере, а хирурзите меѓу себе како посебни луѓе на општеството, зошто само посебни луѓе и се раѓаат како хирурзи, треба и мора меѓу себе да комуницираат и споделат искуства бидејќи нашата крајна цел, иако може да не квалификуваат како арогантни, е здравјето на нашите пациенти. Тоа се непроспиени ноќи бдеејќи над нив, безброј часови поминати во операциони сали, борејќи се за секоја капка крв на нашите пациенти и за секој живот на секој пациент, бидејќи хирургот најдобро од сите знае дека животот е свет дар, кој треба да се чува и спасува.
Господ ги дарил хирурзите со рака на уметник, со сила на ковач и ум на мудрец.
