Раководителот од Одделот за вирусна имунологија во Центарот за инфективни истражувања – Хелмхолц во Германија, Лука Чичин Шаин вели дека се уште нема доволно податоци за давање на одговор на прашањето дали третата доза вакцина против новиот коронавирус ќе биде потребна за сите и како да се знае колку трае имунолошката заштита.
Според него, една нова и добро контролирана студија од Израел покажува дека имунолошката заштита се влошува со тек на времето, но и дека од студијата е јасно дека повеќето лица кои се вакцинирани во февруари и март се уште биле добро заштитени од вирусна инфекција во јуни и јули.
“Затоа не е јасно дали третата доза е неопходна веќе наесен“, вели Чичин Шаин и додава дека третата доза веројатно ќе биде потребна на оние чии имун систем не реагирал добро на првата и втората доза.
Тој додава дека во клиничка студија од Франција, третата доза на вакцината им помогнала на висок процент на луѓе со сериозно нарушен имунитет, кои не развиле антитела по втората доза. Затоа, вели тој, третата доза би имала смисла за луѓето со трансплантирани органи кои мораат да пијат имуносупресивни лекови.
“За постарите лица, чиј имун систем исто така не е ефикасен, се уште нема јасни резултати и дали е тоа апсолутно неопходно и кај колкав процент од луѓето“, заклучува тој, потсетувајќи дека Светската здравствена организација (СЗО) се изјасни против поширока употреба на трета доза, но не затоа што таа би наштетила, туку затоа што овие дози на вакцина се се уште потребни како први дози за многу луѓе во земјите во развој.
Освен за третата доза,на големо се дискутира и за вакцинација на деца од 12 до 17 години.
“Резултатите од клиничките студии покажуваат дека вакцината делува многу ефикасно кај тинејџерите и нема битни несакани ефекти. Во Америка, околу два милиони тинејџери веќе ја примиле вакцина, а како најважен несакан ефект забележан е миокардитис кај околу 60 момчиња на милион вакцинирани, при што тоа кај девојчињата е евидентирано осум пати поретко “, вели Чичин Шаин, но предупредува и дека се поставува прашањето до кој степен вакцинацијата има смисла со оглед на благата клиничка слика што е вообичаена кај младите.
“Инфекциите на тинејџерите и младите се многу чести, но само приближно еден од три илјади тинејџери заразени со КОВИД-19 ќе развијат компликации во однос на миокардитис или мултисистемски воспалителни промени, што ќе доведе до хоспитализации, па дури и смрт. На еден милион заразени тинејџери на возраст од 12 до 17, евидентирани се околу еден до два смртни случаи “, вели Чичин Шаин, додавајќи дека анализата на ризикот и придобивките од американскиот Центар за контрола и превенција на болести сепак јасно оди во корист на вакцинирањето деца и млади луѓе.
