Околу една милијарда млади луѓе во светот се во опасност од губење на слухот во подоцнежни години поради слушањето многу гласна музика преку слушалки или поради престој во простори или на концерти со прегласна музика, покажале податоците на Светската здравствена организација врз основа на повеќе истражувања.
СЗО ги повика младите да обрнат поголемо внимание на нивните навики за слушање гласна музика, а владите и производителите да направат повеќе за да го заштитат здравиот слух на поединците.
Анализата објавена во списанието BMJ Global Health проучувала податоци од 33 научни студии објавени на англиски, шпански, француски и руски јазик во последните две децении. Истражувањето опфатило повеќе од 19.000 учесници на возраст од 12 до 34 години.
Утврдено е дека 24 отсто од младите се изложени на прегласна музика од слушалки на уредите како што се паметните телефони. Исто така, се покажало дека 48 отсто биле изложени на нездрави нивоа на бучава на места како ноќни клубови или концерти.
Комбинирајќи ги достапните податоци, проценето е дека помеѓу 670.000 и 1,35 милијарди млади луѓе би можеле да бидат во опасност од губење на слухот во подоцнежниот живот.
Опсегот е толку широк делумно затоа што некои млади луѓе се изложени на ризик за двата фактори, вели Лорен Дилард, аудиолог од Медицинскиот универзитет во Јужна Каролина и главен автор на студијата.
Таа вели дека најдобар начин да се намали ризикот од губење на слухот поради гласна музика од слушалки е да се намали јачината на звукот и да се намали времето поминато за слушање музика.
Но, признава дека „за жал, луѓето навистина сакаат да слушаат многу гласна музика“.
