Американските експерти ја сменија проценката за бројот на починати од коронавирус и сега предвидуваат дека бројот на смртни случаи до август во САД ќе се искачи на 66.000, што е за 10% повеќе од претходните проекции.
Промената дојде откако државите започнаа со ажурирање на податоците, додавајќи ги штитениците на домовите за стари лица кои починале, а биле позитивни, објасни д-р Крис Мареј, директор на Здравствениот институт на универзитетот Вашингтон.
„Ако луѓето почнат да се враќаат на нормална социјална интеракција, ризикот од трансмисија ќе се зголеми… и тогаш ќе се вратиме на еден вид експоненцијален пораст што се случи пред да одредиме социјална дистанца“, изјави Мареј за Си-Ен-Ен.
Директорот на CDC, Американскиот центар за превенција на болести, за „Вашингтон пост“ предупреди на нов бран на коронавирус во зима.
„Постои голема можност новиот бран на коронавирус во зима да биде многу потежок од овој низ којшто поминуваме моментално“, изјави директорот на CDC, Роберт Редфилд.
„Ќе имаме епидемија на грип и епидемија на коронавирус во исто време“, изјави тој.
Во САД досега се пријавени повеќе од 825.000 случаи на инфекција со коронавирус и 45.000 смртни случаи.
