Српскиот епидемиолог Предраг Кон изјави дека се согласува со мислењето дека бремените жени не треба да примаат вакцина против COVID, бидејќи вакцините на самиот почеток никогаш не се препорачуваат на бремени жени или доилки.
„Со тек на времето, се дознаваат овие податоци кај акцидентални случаи, кога жената ќе се вакцинира, а не знае дека е бремена, па потоа се гледа дали има некакви последици, така што тоа доаѓа со текот на времето. Засега, на самиот почеток, секако дека не се препорачува на бремените жени.
-
Теоретски, нема ниедна причина против, но тоа не значи ништо. Нема ни докази дека ништо не може да влијае на плодот“, изјави Кон за РТС.
Кон, кој е исто така и член на Кризниот штаб за борба против коронавирусот, изјави дека се очекува во јануари на Србија да и бидат достапни повеќе вакцини: „Фајзер-Бионтек“, „Спутник V“, како и кинеската вакцина.
Што се однесува до можноста секој да може да избира вакцина, тој објасни дека тоа зависи од дистрибуцијата и дека станува збор за многу динамичен процес.
„Како се избира вакцина? Онаа којашто е достапна во моментот е вакцината за вас. Така би го кажал јас тоа и така би го решил. Ниту една од овие вакцини за кои зборуваме нема да се најде на пазарот, освен ако не добие одобрение од Агенцијата за лекови и медицински средства. Самиот тој сертификат е доказ за безбедноста и сигурноста и ефикасноста на вакцината“, заклучува Кон.
