Првото бебе родено во 2026 година во земјава е девојче! Точно на полноќ, на Клиниката за гинекологија и акушерство (ГАК) во Скопје, се роди малата принцеза Евгенија.
Евгенија е родена со царски рез, со телесна тежина од 2,8 килограми и должина од 48 сантиметри. Таа е трето дете во семејството Камчеви, а нејзината мајка е 38-годишната Емилија Камчева. И мајката и бебето се во добра здравствена состојба.
Според народните верувања, раѓањето на женско дете како прво во Новата година се смета за добар и среќен знак. Се верува дека годината ќе биде плодна, бериќетна и исполнета со мир и хармонија. Девојчињата се симбол на нежност, грижа и семејна топлина, па нивното доаѓање на самиот почеток на годината се толкува како најава за позитивни промени, напредок и радост.
Иако овие верувања се дел од традицијата, пораката е универзална – секое новороденче е благослов и надеж за подобра иднина.
