Првите индикации за ефикасноста на потенцијалната вакцина против коронавирус се можни наесен, изјави Сет Беркли, извршен директор на меѓународната алијанса за вакцини ГАВИ, за швајцарскиот весник NZZ am Sonntag, додавајќи дека верува оти вакцината долго нема да биде достапна за пошироката популација.
„За жал, ние навистина не знаеме која вакцина ќе делува и дали воопшто ќе ја имаме. Ако имаме среќа, ќе ги имаме првите индикации за ефикасноста на вакцината наесен“, изјави Беркли. „Но, сепак ќе треба да се помине долг пат за одобрената активна супстанца да стане глобално достапна во големи количини“.
Беркли повика на глобални координирани напори за производство и дистрибуција на потенцијална вакцина и рече дека е потребен меѓународен договор за изградба на производствени капацитети за да може откако ќе биде пронајдена вакцината побрзо да се произведува.
„Земјите треба да работат заедно за да можат една со друга да споделат вакцини во случај нечија вакцина да не е добра“, рече Беркли, додавајќи дека е можно некои вакцини да делуваат подобро на младите, а некои на постарите возрасни групи.
Беркли ја повика Светската здравствена организација да објави јасни упатства за употреба и дистрибуција на вакцината за да спречи прво да стане достапна за богатите на штета на оние на кои им е најпотребна.
Ако залихите на ефикасната вакцина бидат првично ограничени, треба да се искористат за имунизација на здравствените работници, истакнал Беркли. (Ројтерс)
