Многу често, кај девојчињата може да се јават вагинални проблеми. За са може навреме да ги препознаете и со тоа и да ги лекувате, важно е да знаете кои се инфекции и промени може да се јават кај девојчињата.
Споре гинеколозите, најчесто се јавува вулвовагинитис кој предизвикува црвенило и чешање. Еве уште кои вагинални проблеми може да се појават кај девојчињата и да им предизвикаат непријатности.
ВУЛВОВАГИНИТИС
Ова е најзастапената инфекција која се јавува кај девојчињата. Најчести симптоми се чешање, чувство на пецкање при мокрење и црвенило на кожата. Се појавува се до пубертетот, а најчести причини се носење тесна облека и зголемена телесна тежиба која го поттикнува потењето. Лекарите истакнуваат дека вулвовагинитисот се јавува и кога детето е под стрес. Адекватен лек не постои, потребно е само да се води сметка за интимната хигиена.
БАКТЕРИСКИ ИНФЕКЦИИ И ВОСПАЛЕНИЈА
Инфекциите на вагиналното подрачје кај девојчињата може да појави во вид на мали капки крв, а најчесто причина се бактериски инфекции кои треба да се утврдат со лекарски преглед. Терапијата за лекување опфаќа употреба на антибиотици.
ИНФЕКЦИИ НА МОЧНИТЕ КАНАЛИ
Воспаленијата и инфекциите на мочните канали знаат да бидат многу болни и непријатни. Симптомите на уринарна инфекција се често и болно мокрење, болка во долниот дел на стомакот, а можно е да се појави и зголемена температура, чувство на мачнина и повраќање. Може да дојде и до промена на бојата на урината од светложолта до темнокафена и црвена, а мирисот да е непријатен. Кај ваквите заболувања неопходно е да се јавите на лекар што е можно побрзо, за да се почне со соодветна терапија. Доколку навреме не се лекува, инфекцијата може да се прошири и на бубрезите.
ГАБИЧНИ ИНФЕКЦИИ
Сите жени, па и девојчињата имаат добри бактерии во вагиналната флора и различни причини може да доведат до дисбаланс на вагиналната микрофлора и до појава на инфекции. Најчести причини кај девојчињата се ослабен имун систем, несоодветна хигиена, носење тесна облека, често користење на антибиотици. Габичните инфекции се предизвикани од кандида, која вообичаено се наоѓа во вагиналната флора на секоја жена, но во мала количина. Кај овие инфекции неопходен е лекарски совет за препорака на најдобра терапија.
