Малиот Неш Кин од Ајова стана најрано родено бебе во светот кое преживеало. Роден е на 5 јули 2024 година, со тежина од 283 грама, цели 133 дена пред терминот. Со ова, тој официјално влезе во Гинисовата книга на рекорди како најрано родено и преживеано бебе.
Неш, кого родителите од милост го нарекуваат „Неш компир“, ги поминал првите шест месеци од својот живот на одделот за неонатална интензивна нега во детската болница „Стед Фемили“.
„Неш има изразен карактер. Бидејќи е толку долго во одделот за интензивна нега, би помислиле дека е нежен. Но, не е. Постојано се смее и е љубопитен за сè“, изјави неговата мајка Моли.
Медицинско чудо
Сè започнало кога Моли на преглед во 20-тата недела од бременоста дознала дека грлото на матката и е отворено два сантиметри. Само неколку дена подоцна, започнале трудови болки, а Неш се роден по 147 дена бременост, еден ден пред претходниот светски рекорд.
Родителите се сеќаваат колку било важно да му веруваат на медицинскиот персонал.
„Целиот тим беше исклучително смирен. Не покажуваа знаци на вознемиреност, па и ние не бевме во паника“, додава Моли.
Со секој нов ден тој станува посилен
Докторката што го породила Неш, д-р Малинда Шефер, објаснува дека претходно разговарала за сите можни ризици и компликации со родителите.
„Важно ми е родителите да ги имаат сите информации за да можат да донесат најдобра одлука за своето семејство“, вели д-р Шефер.
Иако на Неш сè уште му треба кислород и исхрана преку цевка, тој напредува секој ден. Неговите родители велат дека тој веќе вежба стоење и има многу сила во нозете. Неговото доаѓање е особено значајно за семејството бидејќи претходно доживеале спонтан абортус. Денес, тие го слават неговиот напредок со радост и се благодарни за чудото што го доживеале.
