Пискавиот глас каков што го знаеме од цртаните филмови или хумористичните емисии можеме да го добиеме со вдишување хелиум. Иако го сметавме за безопасен, веќе некое време се знае зошто и колку навистина хелиумот е опасен.
Има ли нешто подобро од цел куп балони со хелиум кои лебдат над нас и „се закануваат“ дека ќе одлетаат ако не ги „приземјиме“ како што треба? Ги обожаваме балоните полнети со хелиум! Но, има и нешто уште позабавно – пискавиот глас кој се појавува од твоето грло (без оглед на тоа колку твојот глас е длабок) кога ќе вдишеш малку од тој ист хелиум од балонот.
Смешно! Или можеби не е. Иако повеќето родители веќе го знаат тоа, многумина не се свесни и не го прифаќаат фактот дека хелиумот, односно вдишувањето хелиум, е опасно по здравјето. Покрај тоа, може да биде дури и смртоносно. Една ирска лекарка предупреди на својот профил за оваа опасност, а многу кратко и јасно објасни што всушност прави хелиумот и зошто е толку опасен.
Д-р Ниам Линч во својата објава на Инстаграм, во форма на предупредување до родителите дека хелиумот е одговорен за смртта на многу деца, вклучи и видео од девојче кое вдишува хелиум, како и од последиците што следувале. Во виралното видео, девојчето речиси се онесвестило откако вдишало хелиум од балон. За среќа, со неа била и возрасна личност, најверојатно мајката, која силно ја протресла и ја поттикнала да вдише воздух.
„Кога вдишувате хелиум, тој всушност го истиснува кислородот од белите дробови“, објасни лекарката, која е и мајка на четири деца. „Тоа значи дека ако вдишете хелиум во белите дробови, крвта што циркулира низ вашето тело не носи кислород и затоа е многу веројатно дека ќе се онесвестите или, за жал, како во некои случаи, ќе умрете бидејќи не добивате кислород во мозокот и органите“.
„Не им дозволувајте на вашите деца да го вдишуваат тоа, без оглед на тоа колку е забавно“, апелира лекарката.
