Нов Зеланд од следната година постепено ќе воведе речиси целосна забрана за тутунот, пишува Би-Би-Си. Законот усвоен од парламентот во вторник значи дека секој кој е роден по 2008 година никогаш нема да може да купи цигари или тутунски производи.
Тоа ќе значи дека секоја година ќе се намалува бројот на луѓе кои можат да купат тутун. До 2050 година, на пример, 40-годишниците ќе бидат премногу млади за да купат цигари.
Министерката за здравство Ајеша Верал, која го претстави нацртот, рече дека тоа е чекор „кон иднината без чад“.
„Илјадници луѓе ќе живеат подолго, ќе водат поздрави животи, а здравствениот систем ќе биде побогат за 5 милијарди новозеландски долари (3,2 милијарди долари) со тоа што нема да мора да лекува болести предизвикани од пушењето“, рече Верал.
Стапката на пушење во Нов Зеланд е веќе на историски најниско ниво, со само осум отсто од возрасните кои пушат секојдневно, според владините статистики објавени во ноември – што е пад во однос на 9,4 отсто минатата година.
Очекувањата се дека Законот за животна средина без чад ќе го намали тој број на помалку од пет проценти до 2025 година, со крајна цел целосно да се елиминира оваа практика.
Нацрт-законот исто така е дизајниран да го ограничи бројот на трговци на мало кои можат да продаваат тутунски производи на 600 низ целата земја – од сегашните 6.000 – и да го намали нивото на никотин во производите за да предизвикуваат помала зависност.
„Ова значи дека никотинот ќе се намали на нивоа кои не предизвикуваат зависност и дека заедниците ќе бидат ослободени од пролиферацијата и групирањето на трговците на мало кои продаваат тутунски производи во одредени области“, рече Верал.
