Додека најголемите светски фармацевтски компании се натпреваруваат да најдат третмани за новиот коронавирус, една научничка работи со месеци на потенцијален третман во нејзината спална соба.
Нејзиното име е Аника Чебролу, а има само 14 години.
♦♦♦♦♦♦♦
Аника Чебролу е средношколка од Тексас која веќе учествува во трката за пронаоѓање лек за COVID-19. Чебролу открила молекула која би можела да се врзе за новиот коронавирус и да ја спречи неговата способност да заразува луѓе.
Ова научно откритие и ја донесе титулата „Најдобар млад научник во САД“ на натпреварот за млади научници 2020 година и награда вредна 25.000 долари. Станува збор за престижен годишен настан, на кој се натпреваруваат ученици – потенцијални научници на возраст од 10 до 14 години.
Но, какво е значењето на ова откритие? И како Аника Чебролу стигнала до него?
Клучен протеин
SARS-CoV-2, вирусот што предизвикува COVID-19, има ореол, некој вид на круна што го опкружува, па оттука и името коронавирус (корона е латински збор за круна). Во таа круна се наоѓа шилест протеин, протеин S, кој се врзува за рецепторите во нашите клетки за да ги инфицира.
Од таа причина, многу лаборатории кои се обидуваат да направат вакцина против COVID-19, решија да го нападнат токму овој протеин со цел да спречат вирусот да влезе во нашите клетки.
Истражувањето на Аника Чебролу исто така е фокусирано на овој клучен протеин во вирусот.
„Открив молекула што може да се поврзе со протеинот S во вирусот и потенцијално да ја смени неговата форма и функција“, објаснува Аника за Би-Би-Си.
„Ова е важно заради неговиот потенцијал „да спречи вирусот да се закачи за човечките клетки и затоа да ги намали или излечи понатамошните инфекции во телото на една личност“, додава таа.
Девојчето ја открило оваа молекула преку таканаречената методологија „In silico“. Тоа го направила проучувајќи ги својствата на милиони ситни молекули, вклучувајќи ја и нивната апсорпција, дистрибуција, метаболизам и излачување (ADME).
По оваа студија, Аника Чебролу ја избрала молекулата со најдобра фармаколошка и биолошка активност према протеинот S на вирусот SARS-CoV-2. Тој, потоа, може да се трансформира во потенцијален лек за ефикасен третман на оваа болест, пишува Би-би-си.
