Индуцирана лактација е процес на стимулирање на производството на мајчино млеко кај жена која не била бремена. Овој процес овозможува мајките кои посвојуваат бебе или добиле принова по пат на сурогат мајчинство, да го дојат своето бебе.
Резултатите варираат од жена до жена – некои можат да произведат доволно млеко за целосно хранење на бебето, додека на други ќе им биде потребно дополнително хранење со формула или донорско мајчино млеко. Дури и ако мајката произведе само мала количина млеко, секоја капка носи значајни придобивки за здравјето на бебето и помага во градење на емоционална поврзаност.
Доење без бременост е возможно
„Со значителна посветеност и подготовка, доењето без бременост (индуцирана лактација) може да биде возможно“, објаснуваат од клиниката Мајо.
Ако имате неколку месеци за подготовка, вашиот лекар може да ви препише хормонска терапија, како дополнителен естроген или прогестерон за да се имитираат ефектите од бременоста. Хормонската терапија може да трае со месеци
Нормално, природното производство на мајчино млеко (лактација) обично е поттикнато од комплексна интеракција помеѓу три хормони: естроген, прогестерон и човечки плацентарен лактоген во последните месеци од бременоста. При породување, нивото на естроген и прогестерон опаѓа, дозволувајќи му на хормонот пролактин да се зголеми и да иницира производство на млеко.
Индуцираната лактација зависи од успешната репликација на овој процес. Ако имате неколку месеци за подготовка, вашиот лекар може да ви препише хормонска терапија, како дополнителен естроген или прогестерон за да се имитираат ефектите од бременоста. Хормонската терапија може да трае со месеци.
Околу два месеца пред да започнете со доење, веројатно ќе ја прекинете хормонската терапија и ќе започнете да ги стимулирате градите со електрична пумпа за измолзување млеко. Ова го поттикнува производството и ослободувањето на пролактин. На почеток, пумпајте по пет минути, три пати на ден. Потоа зголемувајте го времето на 10 минути на секои четири часа, вклучувајќи барем еднаш во текот на ноќта. Постепено, продолжете со пумпање по 15 до 20 минути на секои 2 до 3 часа. Одржувајте ја оваа рутина додека не пристигне бебето.
Ако имате краток период за подготовка, хормонската терапија можеби нема да биде опција. Вашиот лекар може да препорача други лекови за поттикнување на лактацијата. Независно од времето што го имате, пумпањето и понатаму останува важно.
Кога ќе започнете со доење на бебето, вашиот лекар може да препорача продолжено измолзување, вклучително и по подојот, за да се одржи снабдувањето со млеко. Дури и ако успешно ја индуцирате лактацијата, може да бидат потребни дополнителни оброци со формула или пастеризирано донирано мајчино млеко, особено во првите недели од доењето. За да поттикнете континуирана стимулација на брадавиците и градите, можете да користите дополнително помагало за хранење кое доставува донорско мајчино млеко или формула преку уред што се прикачува на вашите гради. Дополнителните оброци може да се даваат и со шише. За да го заштитите вашето производство на млеко, пумпајте секој пат кога вашето бебе ќе добие оброк со шише.
За повеќе информации за индуцираната лактација и како да ги зголемите шансите за успешно воспоставување доење, контактирајте консултант за лактација во локална болница или клиника, советуваат од клиниката Мајо.
