ПИШУВА:
Катерина Шекеровска-Димовска
katerina@pedijatar.mk
„Срцевите аритмии најчесто се манифестираат со срцебиење, општа слабост, малаксаност, чувство на глад за воздух, замор…“, објаснува доц. д-р Јане Талески, претседател на Научниот одбор на Интернационалниот симпозиум за аритмии „RhythmMК 2025 – Нов милениум во електрофизиологија и срцева електростимулација“.
Во организација на Работната група за срцеви аритмии и електростимулација, во склоп на Македонското кардиолошко здружение и Клиниката за кардиологија – „Тим аритмии“, од 30 мај до 1 јуни, во хотелот „DoubleTree by Hilton“ во Скопје ќе се одржи Првиот интернационален симпозиум за аритмии „RhythmMK 2025 – Нов милениум во електрофизиологија и срцева електростимулација“. Целта на симпозиумот е да ги обедини аритмолозите од регионот и пошироко, со намера за размена на идеи и искуства, доближување на младите аритмолози и нивно поврзување со искусните кардиолози/аритмолози од нашиот регион и од Европа.
Срцевите аритмии се релативно чести и можат да се јават кај луѓе од сите возрасти. Што, всушност, претставуваат и кога неправилната работа на срцето може да укажува на посериозен проблем?
Доц. д-р Талески: Срцевите аритмии претставуваат нарушувања во срцевиот ритам, кои се појавуваат кај сите возрасни групи. Истите се поделени, според локализацијата на преткоморни и коморни. Коморните се поврзани со посериозни компликации, но за среќа се поретки. Од преткоморните аритмии најчеста е атријалната фибрилација, која се појавува кај 1 на секоја 5 индивидуа, претставува најчестата аритмија во светот и е поврзана со сериозни несакани последици како што е мозочниот удар, срцевата слабост, нарушен квалитет на живот итн.
„RhythmMK 2025“ претставува прв аритмолошки интернационален настан во нашата држава, после успешна и макотрпна работа на сите од „Тим аритмии“, посветенa на намалување на срцевите аритмии во нашиот регион
Срцевите аритмии најчесто се манифестираат со срцебиење, општа слабост, малаксаност, чувство на глад за воздух, замор итн.
Како се третираат срцевите аритмии и дали се спроведуваат на Клиниката за кардиологија?
Доц. д-р Талески: Според препораките на Европското здружение за срце, електрофизиолошката студија и аблацијата на соодветното жариште/та, претставува лек на избор за најголем број од погореопишаните срцеви аритмии. Овие инвазивни процедури ги лекуваат и/или залекуваат, односно намалуваат бројот на епизоди на одредена аритмија, а со тоа и сигнификантно ги намалуваат компликациите од истата и најважно – го подобруваат квалитетот на живот.
Би ги советувал нашите пациенти, што поскоро да се одлучат за долгорочен третман (електрофизиолошка студија и аблација) на срцевата аритмија која им прави проблеми и им го нарушува квалитетот на живот
На Клиниката за кардиологија редовно се работат овие процедури, од наједноставни конвенционални електрофизиолошки процедури на аблација на преткоморните кружни тахикардии до комплексни аблации на атријална фибрилација, како и останати коморни нарушувања во ритамот.
Би ги советувал нашите пациенти, што поскоро да се одлучат за долгорочен третман (електрофизиолошка студија и аблација) на срцевата аритмија која им прави проблеми и им го нарушува квалитетот на живот. Закажете преглед на Клиниката за кардиологија, информирајте се за аритмијата која ја имате и за начините на третман.
Електрофизиологијата и современите медицински технологии имаат клучна улога во дијагностицирањето, следењето и лекувањето на нарушувањата на срцевиот ритам. Во контекст на ова, а на задоволство на стручната фела (најголем бенефит, секако, ќе имаат пациентите), од 30 мај до 1 јуни, Скопје ќе биде домаќин на Првиот интернационален симпозиум за аритмии „RhythmMК 2025“, на кој ќе учествуваат врвни аритмолози од регионот и светот. Како течат подготовките и какви се Вашите очекувања од претстојниот настан?
Доц. д-р Талески: „RhythmMK 2025“ претставува прв аритмолошки интернационален настан во нашата република, после успешна и макотрпна работа на сите од „Тим аритмии“, посветена на намалување на срцевите аритмии во нашиот регион.
„Тим аритмии“ е бренд кој има за цел да овозможи тимска/заедничка работа, да ги доближи и привлече младите кардиолози, кои имаат интерес и желба да работат во ова поле од кардиологијата, но и да овозможи стручно и професионално мислење и совети за срцевите аритмии за нашите колеги, како и за пациентите
Целта на овој симпозиум е да ги обедини аритмолозите од регионот и пошироко, со цел размена на идеи и искуства, да ги доближиме младите аритмолози и истите да ги запознаеме со искусните кардиолози/аритмолози од нашиот регион и секако од Европа.
Кога е формиран „Тим аритмии“ на Универзитетската клиника за кардиологија, како функционира и колку младите лекари се заинтересирани за усовршување во оваа област која бара огромна жртва и посветеност?
Доц. д-р Талески: Со интензивирање на нашите работни активности во салата за електрофизиологија и електростимулација, на почетокот од минатата година е основан „Тим аритмии“. „Тим аритмии“ е бренд кој има за цел да овозможи тимска/заедничка работа, да ги доближи и привлече младите кардиолози, кои имаат интерес и желба да работат во ова поле од кардиологијата, но и да овозможи стручно и професионално мислење и совети за срцевите аритмии за нашите колеги, како и за пациентите.
Дали би сакале да додадете уште нешто, можеби и да упатите покана до Вашите колеги да бидат дел од „RhythmMК 2025“…
Доц. д-р Талески: Би ги поканил сите колеги, особено помладите кои сакаат да дознаат повеќе информации, експертски мислења, најнови препораки за третман на срцевите аритмии, но и да се запознаат со свои колеги од регионот и пошироко, да се пријават и да учествуваат активно и/или пасивно на овој симпозиум. Заедно да го направиме „RhythmMK 2025“ посебен и единствен настан.
