ПИШУВА:
Катерина Шекеровска-Димовска
katerina@pedijatar.mk
На задоволство на фармацевтите, а на бенефит на пациентите, Здружението на приватни аптеки на РС Македонија (ЗПАРСМ), на 14 и 15 ноември во хотелот „DoubleTree by Hilton“ во Скопје го најавува четвртиот симпозиум „Аптекарска здравствена заштита“ – Процес на управување со терапија (МТМ) кај хипертензија, дислипидемија и обезност – Смарт Фармацевт модул 4, кој веќе се наметна како настан со голема важност за фармацевтската фела.
По тој повод разговараме со м-р фарм. Џоана Андоноска, претседателка на Здружението на приватни аптеки на РС Македонија (ЗПАРСМ), која открива кои се главните теми, како се одвиваат подготовките, кои се клучните предавачи, колкаво е значењето на мултидисциплинарната соработка и колку е битна континуираната едукација на фармацевтите како неопходни здравствени партнери.
Кои теми ќе бидат во фокусот на четвртиот симпозиум „Аптекарска здравствена заштита“?
М-р фарм. Андоноска: Четвртиот симпозиум „Аптекарска здравствена заштита“ ќе биде посветен на Процесот на управување со терапијата (Medication Therapy Management – MTM) кај три многу чести и значајни хронични состојби: хипертензија, дислипидемија и обезност кои претставуваат голем товар за здравствениот систем и бараат постојан, систематски и индивидуализиран пристап во грижата за пациентот. Преку реални клинички примери ќе покажеме како добрата координација меѓу фармацевтите и лекарите не само што го подобрува управувањето со терапијата, туку и го намалува ризикот од несакани дејства и интеракции меѓу лековите, ја подобрува адхеренцата и исходот од лекувањето. Ќе се дискутираат најновите научни сознанија, новите трендови во јавното здравство, улогата на фармацевтите во мултидисциплинарните тимови и практичните модели за имплементација на MTM во секојдневната работа, кои ќе придонесат кон подобрување на исходите од терапијата и квалитетот на животот на пациентите.
Најавена е богата и динамична програма. Можете ли да ни откриете кои се главните предавачи, кои ќе ги споделат најновите трендови и добри практики во процесот на управување со терапијата (МТМ)?
М-р фарм. Андоноска: Преку богата програма, симпозиумот ќе понуди предавања од врвни меѓународни и домашни предавачи, меѓу кои клинички фармацевти и експерти со долгогодишна пракса во примената на МТМ. Голема чест ни е што оваа година, како главни предавачи ќе имаме двајца врвни светски експерти, кои меѓу другото, се креатори и автори на концептот „Смарт Фармацевт“.
Преку вакви настани, континуирана едукација и зајакната видливост на нашите резултати, ќе продолжиме да ја зголемуваме свеста за тоа дека фармацевтот е клучен столб на јавното здравство. Нашата мисија е фармацевтот да биде препознаен како најдостапен здравствен професионалец кој има суштинска улога во одржувањето и подобрувањето на здравјето на населението
Аријана Мештровиќ (Arijana Meštrović) – носител на концептот „Смарт фармацевт“ во Македонија, меѓународно признат експерт и едукатор за клиничка фармација и фармацевтска грижа, која ќе говори за трендовите и практиките во јавните и болничките аптеки.
Мајкл Раус (Michael Rouse) – светски професионалец и лидер во областа на фармацевтската едукација и развојот на професионалната компетенција. Тој е директор за меѓународни услуги при Accreditation Council for Pharmacy Education (ACPE) во САД, лидер во глобалните иницијативи за унапредување на фармацевтската едукација и воведувањето на континуиран професионален развој (CPD), кој ќе говори за МТМ моделот на Американската фармацевтска асоцијација (APhA).
Ќе бидат презентирани најновите трендови и добри практики во едукацијата и клиничката имплементација на МТМ моделите.
Процесот на управување со терапијата (MTM) е важен сегмент од фармацевтската практика, особено при третман на хронични состојби како хипертензија, дислипидемија и обезност. Кои се најзначајните аспекти од оваа тема што ќе бидат разработени на симпозиумот?
М-р фарм. Андоноска: Ќе се обработат клучните фази од Процесот на управување со терапија (MTM), почнувајќи од иницијална проценка на терапијата, идентификација и решавање на проблеми поврзани со лековите, преку изработка на индивидуализиран терапевтски план, до континуирано следење и прилагодување на терапијата. Ќе се нагласи значењето на едукацијата на пациентот, мотивацијата за придржување кон терапијата, како и превенцијата на компликации преку навремени фармацевтски интервенции.
На симпозиумот ќе бидат презентирани најновите трендови и добри практики во едукацијата и клиничката имплементација на МТМ моделите
Симпозиумот е дел од едукативниот проект „Смарт Фармацевт“, кој нуди квалитетна стручна надградба. Впрочем, името „Смарт Фармацевт“ не е случајно – тоа ја носи идејата за стручен, мотивиран, напреден, одговорен и тимски ориентиран фармацевт. Кој дел од програмата оваа година, според Вас, најсилно ја претставува оваа визија?
М-р фарм. Андоноска: Визијата за стручен, мотивиран, напреден, одговорен и тимски ориентиран фармацевт најдобро ќе се отслика преку интерактивните клинички сесии со реални, сложени случаи, каде учесниците ќе имаат можност да донесуваат клинички одлуки, да предложат подобрувања на терапијата и да ја вежбаат мултидисциплинарната комуникација.
Добрата координација меѓу фармацевтите и лекарите не само што го подобрува управувањето со терапијата, туку и го намалува ризикот од несакани дејства и интеракции меѓу лековите, ја подобрува адхеренцата и исходот од лекувањето
Тоа е директна демонстрација на вредностите „Смарт Фармацевт“ – стручност, мотивираност, напредност, одговорност и тимска работа. Овој дел од програмата не е само теорија бидејќи им овозможува на фармацевтите да го применат наученото веднаш, во безбедна и контролирана средина, а потоа и во секојдневната работа.
Како се поттикнува мултидисциплинарната соработка меѓу фармацевтите и другите здравствени професионалци во рамките на симпозиумот и што значи таа за квалитетот на грижата за пациентот?
М-р фарм. Андоноска: Симпозиумот е платформа која ги обединува фармацевтите, матичните лекари, специјалистите и болничките фармацевти. Со тоа се гради заеднички јазик и доверба, што овозможува побрза и поефикасна размена на информации, координација на терапијата и следење на пациентите. Оваа соработка е клучна за обезбедување на сеопфатна грижа за пациентот, затоа што секој професионалец внесува свој специфичен придонес – од прецизна дијагностика и медицински третман, до фармацевтска поддршка и едукација за рационална и правилна употреба на терапијата.
Резултатот е – повисок квалитет на грижа, помал ризик од грешки, дуплирање на терапијата и поголемо задоволство на пациентите.
Очигледна е сè поголемата улога на фармацевтот во јавното здравство и во третманот на хронични заболувања. Дали сметате дека фармацевтите се доволно препознаени како клучни здравствени професионалци и дека го добиваат вниманието што го заслужуваат?
М-р фарм. Андоноска: Иако улогата на фармацевтот сè повеќе се препознава, сметам дека уште не е целосно препознаена и вреднувана во здравствениот систем, особено во превенцијата и менаџирањето на хроничните заболувања. Пандемијата и растечката потреба за индивидуален пристап и управување со хроничните заболувања покажа дека фармацевтите се неопходни здравствени партнери – достапни, стручни и подготвени да преземат активна улога во превенцијата и следењето на терапијата. Има уште многу простор за унапредување, преку јакнење на правната рамка, зголемување на јавната свест и активно вклучување на фармацевтите во креирањето на здравствените политики.
Верувам дека преку вакви настани, континуирана едукација и зајакната видливост на нашите резултати, ќе продолжиме да ја зголемуваме свеста за тоа дека фармацевтот е клучен столб на јавното здравство. Нашата мисија е фармацевтот да биде препознаен како најдостапен здравствен професионалец кој има суштинска улога во одржувањето и подобрувањето на здравјето на населението.
