Младите луѓе, децата, адолесцентите и младите возрасни, се дружат повеќе отколку постарите генерации. Покрај тоа, младите претежно живеат во повеќегенерациски домаќинства каде пренесувањето на вирусот е подоминантно
Новото истражување покажува дека луѓето под 24-годишна возраст се повеќе се заразуваат со коронавирус. Експертите велат дека не е изненадувачки што младите возрасни лица го движат овој бран. Кај младите луѓе заболени со COVID-19 е помала веројатноста да развијат компликации, но тие можат да го пренесат вирусот на поосетливите лица, предупредуваат експертите.
Тие истакнуваат дека е важно и понатаму да продолжиме да носиме маски и физички да се дистанцираме се додека не се постигне посакуваниот процент на вакцинација. Иако постарите лица беа во центарот на вниманието за време на пандемијата на коронавирус и се сметаше дека полесно се заразуваат, новото истражување покажува дека помладата популација има поголема веројатност да заболи од коронавирус.
Податоците за смртноста објавени од Американскиот центар за превенција и контрола на болести (CDC) откриваат дека скоро три милиони заразени лица се на возраст од 24 години или помлади. Во извештајот се наведува дека околу 57% од новите случаи биле потврдени кај лица на возраст од 18 до 24 години. Податоците сугерираат дека вирусот сега побрзо ги погодува помладите затоа што највисоката инциденца се случила во последната недела од набљудуваниот период.
Младите помалку се придржуваат до мерките
Ова е потврдено и од наодите од студијата објавена во списанието „JAMA Pediatrics“, која открила дека неодамнешните хоспитализации на деца заболени со COVID-19 биле речиси девет пати поголеми отколку во текот на пролетта минатата година. Експертите велат дека е малку веројатно кај младите лица да се развие потешка форма на COVID, но предупредуваат дека овие бројки се загрижувачки затоа што новите случаи се во пораст низ САД.
Д-р Стивен Расел истакнува дека младите луѓе, децата, адолесцентите и младите возрасни, се дружат повеќе отколку постарите генерации. Покрај тоа, младите претежно живеат во повеќегенерациски домаќинства каде пренесувањето на вирусот е подоминантно. Исто така, помалку е веројатно дека луѓето на возраст од 18 до 24 години ќе се придржуваат кон превентивните мерки.
„Младите луѓе се со поголема веројатност да бидат асимптоматски носители и затоа можат лесно несвесно да го пренесат вирусот на други луѓе. Многу млади возрасни лица исто така знаат дека ризикот од смрт или развој на компликации кај оваа возрасна група е многу низок, поради што помалку се придржуваат до пропишаните мерки“, изјави Расел за „Healthline“.
♦♦♦♦♦♦♦
СОСТОЈБА СО КОРОНАВИРУС ВО ЗЕМЈАВА: ИЗВЕШТАЈ НА ИЈЗ ОД 18 ДО 24 ЈАНУАРИ
Намалување од 28% на нови случаи и 12,7% на починати, споредено со претходната недела
Според неделниот извештај на Институтот за јавно здравје во периодот од 18 до 24 јануари 2021, во земјава се тестирани вкупно 11.036 материјали во лабораториите во кои се спроведува молекуларно тестирање и антигенско тестирање за присуство на SARS-CoV-2, со намалување од 21,8% во однос на минатата недела. Регистрирани сe 1.727 нови позитивни случаи од 34 градови во државата со намалување од 28% во однос на минатата недела.
Најголем дел од регистрираните случаи се од Скопје (n=851; 49,3%), со неделна инциденца – 137,8/100.000. Највисока неделна инциденца од 190,5/100.000 е регистрирана во Кавадарци.
Процентот на позитивност во споменатиот период се движи од 9 до 19%, или во просек 14%, што претставува намалување од 2% во однос на минатата недела.
Регистрирани се заболени лица во сите возрасни групи. Најзастапена е возрасната група на лица на возраст над 60 (n=507, 29,4%). Голем број на заболени се регистрира и кај лицата во возрасните групи од 40-49 (n=299; 17,3%), 50-59 (n=298; 17,3%), 30-39 (n=287; 16,6%), и 20-29 (n=231; 13,4%). Најмал број е регистриран кај децата од 0-9 (n=32; 1,9%) и 10-19 години (n=73; 4,2%).
По добиени 2 негативни теста за присуство на SARS-CoV-2 или со употреба на новиот алгоритам, како оздравени се водат 5.084 лица кои биле хоспитализирани или на домашно лекување, 12,1% помалку во споредба со минатата недела.
Пријавени се 69 смртни случаи од 23 града, со намалување од 12,7% во однос на минатата недела. Во однос на возраста, 55 лицa биле над 60 години, 11 лица на возраст од 50-59 години, 2 лица на возраст од 40-49 години и едно лице од 30-39 години.
