Луѓето заразени со делта варијанта на коронавирус имаат 300 пати поголемо вирусно оптоварување од оние заразени со оригиналната варијанта на вирусот, покажала јужнокорејска студија.
Поголемото вирусно оптоварување значи дека вирусот се шири многу полесно меѓу луѓето, зголемувајќи го бројот на заразени и хоспитализирани
Сепак, ова вирусно оптоварување со текот на времето постепено се намалува, до 30 пати е повисоко за четири дена и над 10 пати за девет дена, и се совпаѓа со вирусното оптоварување кај другите варијанти на вирусот по 10 дена, објави денеска Корејската агенција за контрола и превенција на болести (KDCA).
Поголемото вирусно оптоварување значи дека вирусот се шири многу полесно меѓу луѓето, зголемувајќи го бројот на заразени и хоспитализирани, рече на прес-конференција службеникот на Министерството за здравство, Ли Санг-вон.
„Но, тоа не значи дека делта варијантата е 300 пати позаразна… Мислиме дека нејзината стапка на репродукција е 1,6 пати поголема од алфа варијантата, и околу двапати поголема од оригиналната варијанта“, рече тој.
Делта варијантата за првпат беше идентификувана во Индија, а алфа варијантата во Британија.
Истражувачите го споредиле вирусното оптоварување кај 1.848 пациенти заразени со делта варијанта со вирусното оптоварување на 22.106 лица заразени со другите варијанти.
Јужна Кореја во понеделникот пријави 1.509 новозаразени, со што бројот на заразени се искачи на 239.287, а починале 2.228 луѓе, пренесува „Индекс“.
