“Овчите сипаници се една од најчестите детски заразни болести кои ги предизвикува вирус. Кога вирусот ќе влезе во организмот, потребни му се околу осум дена до три недели пред да се појават првите знаци на болеста. Болеста почнува неспецифично, како секоја вироза – зголемена температура и мало течење на нос. Веќе по 24 часа, почнуваат да избиваат типични промени на кожата. Црвенилто многу брзо во средината добива воден меур кој брзо пука и се создава мала краста“, вели доц. д-р Миливој Јованчевиќ, специјалист педијатар.
Детето е заразно еден-два дена пред да избијат сипаниците, и седум дена откако тие траат. Потоа, почнува период на опоравување, кога детето веќе не е заразно и кога полека крастите се губат и паѓаат.
“Станува збор за високо заразна болест и ако влезете во просторија во која се наоѓа заболен, а не сте ги прележале, имате 98% шанса дека ќе ги добиете. Опасно е ако жена која е бремена добие варичела, оти тогаш плодот е во голема опасност“, вели д-р Јованчевиќ и додава дека се проценува дека околу 5 до 10 проценти од возрасните немаат прележано овчи сипаници, кои во возрсниот период е многу тешка и по живот опасна болест.
“Кога ќе се јави овчата сипаница, потребно е да се намалува телесната температура, нема излегување надвор, треба да се контролира кој влегува во просторијата во која престојува заболениот за заразата да не се шири, да се одржува вообичена хигиена на кожата, редовно да се мие, без триење. Ако во меурчето влезе бактерија, која ќе предизвика гноен процес или воспаление, тогаш може да остане лузна. По некое време, откако ќе помине болеста, остануваат темни пеги кои потоа бледеат, но не остануваат лузни“, објаснува педијатарот.
Тој вели дека овчите сипаници може да доведат и до некои компликации, како што се бактериско воспаление на средното уво, а воспаление на белите дробови, мозокот, мозочната обвивка се многу ретки.
