Ширењето на бактерии отпорни на антибиотици претставува голема закана за глобалното здравје и безбедноста на храната додека употребата на антибиотици продолжува да расте. И сега, тим истражувачи од Квебек и Франција велат дека бактериите со гени отпорни на антибиотици можат дури да се шират и преку облаците.
„Овие бактерии обично живеат на лисјата или во почвата. Откривме дека ветрот ги носи во атмосферата и дека можат да патуваат на долги растојанија, па дури и да ја обиколуваат земјината топка на големи височини благодарение на облаците“, изјави водечкиот автор на студијата Флорент Роси во интервју за АФП.
„Овие бактерии обично живеат на лисјата или во почвата. Откривме дека ветрот ги носи во атмосферата и дека можат да патуваат на долги растојанија, па дури и да ја обиколуваат земјината топка на големи височини благодарение на облаците“, изјави водечкиот автор на студијата Флорент Роси
Со „вшмукувачи“ земале примероци од облавите
За да дојдат до овие заклучоци, истражувачите од Универзитетот Лавал во Квебек и Универзитетот Клермон Оверњ користеле „вшмукувачи“ со голема брзина за да земат примероци од облаците кои се формирале над Пуј де Дом, заспан вулкан во централна Франција, во периодот од септември 2019 до октомври 2021 година. Научниците ги анализирале овие примероци во потрага за гени отпорни на антибиотици.
8 000 бактерии на милилитар вода од облаци
Облаците содржеле меѓу 330 и повеќе од 30.000 бактерии на милилитар вода, или во просек околу 8 000 бактерии на милилитар. Во бактериите исто така биле идентификувани 29 подтипови на гени отпорни на антибиотици.
Со широката употреба на антибиотици во здравството, но и во земјоделството, ова претставува голем здравствен предизвик на глобално ниво, се вели во студијата. Светските здравствени власти постојано ги истакнуваат ризиците поврзани со овие бактерии, поради кои третманот на одредени инфекции е сè покомплексен.
Длабинското следење на атмосферата би можело да овозможи да се лоцира од каде доаѓаат овие бактерии отпорни на антибиотици и на тој начин да се ограничи нивното атмосферско ширење, вели водечкиот автор на новата научна студија
Само 5 до 50 проценти од овие бактерии можат да бидат живи и активни
Студијата, сепак, не нуди заклучоци за можните здравствени ефекти од ширењето на бактерии кои носат гени за отпорност на антибиотици, проценувајќи дека само помеѓу 5 и 50 проценти од овие организми може да бидат живи и потенцијално активни.
„Атмосферата е многу сурова за бактериите, а повеќето од оние што ги најдовме беа бактерии од околината, со помала веројатност дека ќе бидат штетни за луѓето“, рече Флорент Роси.
Одењето на дожд не треба да предизвикува страв
Значи, нема од што да се плашите кога шетате на дожд, иронично вели научникот, додавајќи дека сè уште не знаеме дали овие гени може да се пренесат на други бактерии.
Сепак, длабинското следење на атмосферата би можело да овозможи лоцирање од каде доаѓаат овие бактерии и со тоа да се ограничи нивното ширење, сугерира Роси, земајќи ја како пример анализата на отпадните води за откривање на присуство на коронавирус и други патогени.
Студијата е објавена во мартовското издание на часописот „Science of The Total Environment“.
