На депресијата, или најгалопирачката модерна болест, не се имуни ниту децата. Иако за еден родител е тешко да поверува дека и неговото дете може да се бори со вакво психичко нарушување, сепак таквата состојба никако не треба да се занемарува. Освен што влијае на среќата на детето, депресијата што детето ја влече од раното детство во пубертетот може да доведе и до самоубиства, што е водечка форма на смртност кај децата и младите на возраст од 10 до 24 години. Неколку фактори, како што е минување низ трауматско случување или родител со депресија, го зголемува ризикот од депресија кај детето. За Македонија податоците не се познати, но во САД 2 до 3% од децата на возраст од 6 до 12 години имаат сериозна депресија, а кај тинејџерите тој процент изнесува од 6 до 8.
Секое дете има свој период на тага, но следниве симптоми се знаци кои би требало да ги загрижат родителите и може да бидат знак за детска депресија.
- НЕСОНИЦА ИЛИ ПРЕСПИВАЊЕ
Ако детето спиело долго, а одеднаш не може да заспие со часови, треба да обрнете внимание и да ја пронајдете причината. На внимание упатува и спротивен тренд, ако детето постојано чувствува замор, дури и по долго спиење. Децата од 6 до 12 години дневно треба да спијат од 9 до 12 часа, а тинејџерите од 13 до 18 години, од 8 до 10 часа.
- НЕВОЛНОСТ И МРЗЕЛИВОСТ
Ако тоа не е нормално однесување за детето, мрзливоста би можела да биде знак на недостаток на мотивација. Тешко дека детето ќе му се довери на родителот или дека ќе знае да каже како се чувствува, па на родителите е сами да оценат дали станува збор за сериозна состојба или минлив замор.
- НЕМАЊЕ КОНЦЕНТРАЦИЈА
Иако е познато дека децата тешко може да се концентрираат, губењето на концентрацијата на која сте навикнале кај своето дете дефинитивно е повик за внимание. Особено ако губењето на концентрацијата се случува околу нешто што особено го сакале – читање, играње игри, слушање приказни.
- ПРЕМНОГУ СОЛЗИ
Плачењето е детски начин да кажат “жал ми е“. Тоа е важно да се запомни, особено што како децата растат се потешко се доверуваат. Научете да прочитате од солзите дали детето има проблем и дали солзите се поради нешто неважно или се сигнал дека нешто што го мачи. Нивната солза може да биде крик за помош кој не знаат да го кажат на поинаков начин.
- ПРОБЛЕМИ СО АПЕТИТОТ
Децата кои се во депресија, често доживуваат промени во апетитот.
- ПРИЈАТЕЛИ
Депресивните деца се повлекуваат од друштвото и не сакаат да комуницираат со пријателите. Губењето интерес за пријатели, семејство или занемарување на активностите што ги сакале, е еден од начините на кои се соочуваат со своите доследни чувства на тага.
- ВИНА
Депресијата има тенденција да го отфрли секое самопочитување кое детето го има и создава чувство на вина. Кај децата тоа може да се забележи ако премногу се извинува или долго се чувствува виновно поради некоја грешка.
- НЕМИР
Ако вашето дете одеднаш стане раздразливо и на се бурно регаира, можно е нешто навистина да го мачи со што тешко се носи и му е потребна помош.
