Јајцата – варени и вапсани со вештачки или природни бои и украсени на традиционален начин – се незаменлив симбол на Велигден. Тврдо варените јајца се многу хранливи и одлична опција за здрава ужина или како дел од балансиран оброк.
Но, колку долго може да се чуваат варените јајца во фрижидер? Секако знаете дека може да се консумираат јајца кои се вапсани единствено со бои на чија декларација е назначено дека се за јадење. Вапсаните јајца, исто како и варените се чуваат исклучиво во фрижидер.
Доколку нивната лушпа не е оштетена, може да се чуваат во фрижидер до консумирање и повеќе од една недела. Доколку имаат оштетена лушпа или се без лушпи, пожелно е да се изедат во рок од 1-2 дена, при што се чуваат задолжително во фрижидер.
Исто така, најдобро е да ги чувате во картонска кутија или во херметички затворен сад. Чувајте ги на внатрешната полица, а не на вратата, бидејќи честото отворање и затворање на фрижидерот може да предизвика варирање на температурата во тој дел.
Во случај да купите веќе вапсани јајца во продавница, треба да ги следите упатствата на производителот за тоа како и до кога да ги чувате.
Секогаш важи правилото – ако варените јајца го промениле мирисот, бојата (која не доаѓа од боите за јајца) и конзистентноста – не се за консумирање.
