Родителите секогаш си замислуваат каква ќе биде бојата на очите на нивните деца – според своите желби. Некои преферираат сини, други зелени, а ретко кој посакува кафеави – бидејќи се најчести. Но, никој не очекува да добие бебе со очи во различна боја. Станува збор за една ретка појава која без здив остава секого, особено кога станува збор за деца – како што е случајот со девојчето Октавија Моника од градот По, во југозападна Франција.
Октавија Моника е родена на 21 декември 2023 година и има очи во различна боја. Од моментот кога нејзината мајка Манон ја објави првата фотографија на Инстаграм, таа ја освои светската јавност.
Октавија Моника има хетерохромија
Октавија Моника има ретка состојба што ја има помалку од 1% од светската популација, и која во стручната литература се нарекува хетерохромија. Тоа значи дека поради неправилен развој на ирисот на окото, предизвикан од нарушена пигментација, нејзините ириси добиле различно количество на меланин (пигмент), па така – поради вишок или недостаток на меланин – се појавила различна боја на очите.
Малата Французинка, поради сè наведено, има едно кафеаво и едно сино око, што ја прави исклучително посебна и многу сакана кај интернет-публиката. Нејзините фотографии со родителите Манон и Баптист им донесоа десетици илјади следбеници на Инстаграм.
Хетерохромијата може да биде вродена или стекната
Хетерохромијата може да биде вродена, односно конгенитална (генетска карактеристика која се наследува од родителите или поширокото семејство), што е почеста појава, или стекната, која поретко се јавува (како последица од физичко оштетување на ирисот, воспаленија, употреба на одредени лекови за глауком или поради тумори).
Исто така, хетерохромијата може да биде целосна (кога едниот ирис е целосно различен по боја од другиот, како што е случајот со Октавија – едно око сино, другото кафеаво) или делумна (кога еден дел од ирисот е со различна боја од остатокот), што често се јавува кај лица со наследни автоимуни болести како Хиршпрунгова болест и Варденбургов синдром.
Познати личности со различна боја на очи
Инаку, многу познати личности имаат хетерохромија, односно различна боја на очите – нешто што воопшто не им претставувало пречка да успеат во јавните професии со кои се занимаваат. Напротив – токму тоа им помогнало полесно да се издвојат и да ја добијат својата шанса да го покажат талентот, кој подоцна ќе преовладее над нивната необичност.
Некои од најпознатите од светот на музиката и филмот се Дејвид Боуви, Роберт Дауни Јуниор, Мила Кунис, Кејт Босуорт, Оливија Вајлд, но и Александар Македонски.
