Во првата минута од Новата година, веднаш по полноќ на Клиниката за гинекологија и акушерство во Скопје на свет дојде машко новороденче, Јаков – првото бебе во 2025 година! Освен што е прво бебе во Новата година, новороденчето е и прва среќа на мама Сања и тато Александар и нивен најубав новогодишен подарок.
„Првото бебе во 2025 година се роди на Универзитетската клиника за гинекологија и акушерство во Скопје во 00.01 часот. Годинава ја почнавме со принц! Бебето е од машки пол, тешко е 3190 грама, долго 50 сантиметари и е прво на мама и тато“, информираа од ГАК.
Освен што е прво бебе во Новата година, Јаков е и прва среќа на мама Сања и тато Александар и нивен најубав новогодишен подарок
Јаков бил нетрпелив, па стигнал малку пред предвидениот термин, а породувањето со царски рез го извршил дежурниот тим на ГАК.
„Постапија по протоколите и на свет го донесоа Јаков, којшто еве и по името навестува една убава, јака година којашто се надевам на сите ќе ни биде плодна и бериќетна. Од нашата клиника секогаш насмеани ги испраќаме пациентите и ние сме единствените каде си одат со солзи радозници и посакувам што повеќе да доаѓаат тука“, изјави проф. д-р Ирена Алексиоска-Папестиев, директорка на Клиниката за гинекологија и акушерство – Скопје.
Мајката на Јаков, Сања Талевска – Догазанска ги сподели своите впечатоци. „Терминот беше планиран за јануари, не изненади малку порано, но еве, убав подарок за Нова година. Тимот којшто ме породи беше одличен, така што супер поминав и јас“, додаде среќната мајка, која од надлежните на вчерашната средба доби традиционално пригодни подароци.
Новороденчето и мајката се во одлична состојба. Првите денови на Новата година се симбол на нов почеток, надеж и радост, а Јаков, со своето име, го носи духот на упорност, благослов и трансформација, што му посакуваме да го следат низ целиот живот.
Нека е здрав и жив, голем да расте и да ги радува мама и тато!
