На Универзитетската клиника за гинекологија и акушерство – Скопје денеска се роди женско бебе-близнак заедно со амнионска обвивка, информираат од ГАК.
„Родилката беше со близначка бременост, а бебињата се родени во 34-та гестациска недела. Станува збор за двојајчана близначка бременост, што значи дека двете бебиња имаа засебни амнионски обвивки и засебни постелки, а породувањето беше извршено со царски рез“, се вели во објавата на фејсбук профилот на ГАК.
Од Клиниката информираат дека породувањето го извршила примариус д-р супспецијалист Адела Стефанија, а бебињата се преземени од педијатар супспецијалист Рената Димитриеска. Тие се наоѓаат на ОИНТ и се во добра состојба.
Машкото бебе има 2.210 грама родилна тежина и е родено со апгар 8/9, а женското бебе, кое било извадено со амнионската обвивка, е тешко 2.150 грама и е со апгар 7/8. Нека се здрави и живи!
