„На секои 3 минути едно дете умира од рак. Сама по себе, оваа фраза е манифест, бидејќи ниту едно дете не треба да умре од рак, ниту едно дете не треба да умира во зората на животот, ниту едно дете не треба да страда. Затоа во 2018 година беше покрената глобалната иницијатива на СЗО за рак кај децата. Нејзината цел? Да се зголемат стапките на преживување од карцином во детската возраст на најмалку 60 проценти до 2030 година и да се ублажат страдањата поврзани со ракот кај сите деца заболени од рак. Ако ја постигнеме оваа цел, ќе спасиме 1 милион животи“, изјави Јоао де Браганца, претседател на „Childhood Cancer International“.
Повеќето карциноми во детството може да се излекуваат со комбинација на хемотерапија и други третмани, вклучувајќи хирургија и радиотерапија
Светот денеска го одбележува Меѓународниот ден на децата болни од рак, глобална кампања за подигнување на свеста за ракот кај децата и за изразување поддршка на децата и адолесцентите со рак, преживеаните и нивните семејства.
Денот промовира поголемо уважување и подлабоко разбирање на прашањата и предизвиците кои се однесуваат на ракот во детската возраст и влијанието врз децата/адолесцентите со карцином, преживеаните, нивните семејства и општеството како целина.
Исто така, ја потенцира и потребата за порамноправен и подобар пристап до третман и нега за сите деца со рак, насекаде.
Темата на годинешната кампања е: „Подоброто преживување е можно“. Тригодишната кампања (2021-2023) користи универзална слика на шарени отпечатоци на детски раце за да ги претстави стапките на преживување на децата заболени од рак на национално, регионално и меѓународно ниво.
„На Меѓународниот ден на децата заболени од рак, ние зборуваме со еден глас: гласот на децата, адолесцентите и младите возрасни со карцином од целиот свет, особено каде што стапките на преживување се скандалозно ниски. На овој датум целата заедница за рак во детството се држи за раце за да привлече внимание кон овој човечки предизвик. Ние мораме – и ние можеме – да ги подобриме стапките на преживување, особено во LMIC. Можно е подобро преживување. И тоа може да се постигне преку нашите раце“, вели Де Браганца во својата порака по повод Меѓународниот ден на децата заболени од рак.
Клучни факти
- Ракот е водечка причина за смрт кај деца и адолесценти ширум светот. Околу 400.000 деца на возраст од 0 до 19 години се дијагностицираат со рак годишно ширум светот.
- Најчестите категории на карцином кај деца вклучуваат карцином на крвта (леукемија и лимфом), тумори на мозок и цврсти тумори, како што се невробластом и Вилмсов тумор.
- Во високо развиените земји, над 80% од децата заболени од рак преживуваат, но во многу земји со ниски и средни примања преживуваат само околу 20%.
- Дури и во високоразвиените земји, детскиот карцином е водечка причина за смрт на деца.
- Потеклото на карциномот кај децата е претежно непознато, не е поврзано со начинот на живот и не може да се спречи или открие рано со скрининг.
- Подобрување на исходот кај деца заболени од рак бара рано и точно дијагностицирање, проследено со ефективен третман.
- Повеќето карциноми во детството може да се излекуваат со комбинација на хемотерапија и други третмани, вклучувајќи хирургија и радиотерапија.
- Смртните случаи што можат да се избегнат од рак во детството во слабо и средно-развиените земји се јавуваат поради недостаток на дијагноза, погрешна дијагноза или задоцнето дијагностицирање, препреки во пристап до нега, напуштање на лекувањето, смрт од токсичност и повисоки стапки на рецидив (болеста се повторува).
- Во средини со повисоки примања, недостатокот на терапевтски иновации е клучна пречка и причина за стагнација на преживување кај малигните заболувања кои тешко се лекуваат.
- Системи за податоци за карцином кај деца, како што се регистри на пациенти, заедно со одржливи инвестиции во здравствените системи и инфраструктура за навремено дијагностицирање и лекување, се потребни за континуирано унапредување на квалитетот на нега.
ПРОЧИТАЈТЕ И…
