Во Финска, Норвешка и повеќето скандинавски места, децата од најмлада возраст попладневното спиење го поминуваат во колички на свеж воздух. Овде не зборуваме за спиење на пријатни летни и пролетни температури, туку за зимски услови и температури кои често паѓаат во минус.
Поквалитетен и подобар сон
Во вакви услови, малите Скандинавци понекогаш спијат и до три часа, на терасите од кафулињата или во парковите.
Колку и да звучи необично оваа пракса за остатокот од светот, истражување спроведено на Универзитетот Оулу во Финска покажало дека спиењето во овие услови овозможува поквалитетен и подолг сон.
Родителите субјективно заклучуваат дека оваа навика значајно влијае на имунитетот на детето и го прави поотпорно на најчестите детски болести.
Добрата облека е клучна
Останатите субјективни забелешки говорат во прилог на тоа дека децата кои спијат на овој начин се посреќни, имаат повеќе енергија, подобро спијат ноќе и можат да заспијат во секоја средина, без разлика колку е гласна и светла.
И во Македонија се повеќе родители се обидуваат да ги применат скандинавските воспитни методи, а кон тоа придонесуваат и се поголемиот број на достапни книги на оваа тема. Она што треба да се има на ум е дека ваквата практика бара добра облека во која и вие и детето ќе се чувствувате удобно додека престојувате надвор на ниски температури.
