Преселувањето понекогаш е финансиски мудра одлука, но експертите предупредуваат дека тоа може да има негативно влијание врз менталното здравје на децата.
Младите луѓе кои се преселиле само еднаш на возраст од 10 до 15 години имаат 41 отсто поголеми шанси да заболат од депресија подоцна во животот, открива новото истражување на научниците од Велика Британија и Данска. Оние кои се селеле двапати или повеќе имале 61 отсто поголем ризик од оваа состојба.
Оние кои се селеле двапати или повеќе имале 61 отсто поголем ризик од депресија
„Знаеме дека има голем број фактори кои доведуваат до дијагноза на ментална болест. Сепак, ова е првиот доказ кој сугерира дека меѓу нив е и преселувањето во ново соседство во текот на детството“, коментира професорот Клајв Сабел од Универзитетот во Плимут.
Тој вели дека децата ги градат своите друштвени мрежи во текот на годините на формирање преку училиште, спортски групи или други активности.
„Секој пат кога треба да се прилагодат на нешто ново, тоа може да делува деструктивно, така што потенцијално треба да најдеме нови начини да им помогнеме на луѓето да ги надминат овие предизвици“, додаде професорот.
Студијата, објавена во списанието JAMA Psychiatry, опфатила речиси 1,1 милион луѓе родени во Данска помеѓу 1981 и 2001 година. Следела колку пати се преселиле во првите 15 години и открила дека на најмалку 35.000 млади луѓе подоцна им била дијагностицирана депресија.
Луѓето кои често се селеле за време на детството исто така биле посклони кон обиди за самоубиство, криминални дејствија и злоупотреба на супстанции. Се верува дека до 13 отсто од светската популација живее со некоја форма на нарушување на менталното здравје.
