Британските експерти предупредуваат дека луѓето заразени со делта сојот на коронавирус многу почесто покажуваат симптоми слични на обична настинка, додека податоците од тамошниот јавен здравствен систем покажуваат дека најчестите симптоми на заразените се губење на мирис, болки во грлото, кивање и главоболка, пренесува Нет.хр. Во продолжение неколку симптоми споделени од корисниците на платформата Reddit, а за кои ретко се дискутира.
ОСИП
Многумина забележале голем број проблеми со кожата откако се заразиле со коронавирус. Но, тие не биле предизвикани од самиот вирус, туку од прекумерната реакција на имунолошкиот систем, што предизвикало оштетување на капиларите. Некои постојано ги чешала кожата, а кај некои осипот бил толку силен што морале да побараат лекарска помош.
Објаснувањето е релативно едноставно – додека вирусот ги уништува клетките се ослободува хистамин, што пак го стимулира имунолошкиот одговор. Истражувањата покажале дека проблемите со кожата се придружен дел на 26 проценти од инфекциите со коронавирус.
СУВА КОЖА И ЛУПЕЊЕ
Повеќе луѓе рекле дека по инфекцијата нивните дланки и стапала почнале да се лупат.
„Изгледаат како смрзнатини, најчесто на прстите на нозете, но може да се појават и на дланките и вклучуваат лупење на кожата“, рече британскиот професор Тим Спектор.
БРЧКАЊЕ НА ЈАГОДИЦИТЕ НА ПРСТИТЕ
Една 23-годишна жена се пожалила дека нејзините јагодици на прстите се збрчкувале веднаш штом ќе допрела вода. Тоа почнало да се појавува петтиот ден откако се заразила, и иако станува збор за вообичаена реакција на долготрајно изложување на вода, кај неа се јавувало дури и кога чувствувала дека рацете и се суви, а кожата напната.
НЕСОНИЦА
Многумина се пожалиле на несоница откако се заразиле со вирусот, а д-р Тим Спектор истакнува дека најверојатно тоа е резултат на стрес, дехидратација и други проблеми поврзани со болеста, отколку вистинска несоница.
Лекарот предупредува дека меѓу петте најчести симптоми на кои се жалеле луѓето позитивни на коронавирус ја нема ниту постојаната кашлица ниту грозница, па затоа здравствените служби треба да го ревидираат списокот.
