Нобеловата награда за физиологија или медицина за 2024 година им припадна на американските научници Виктор Амброс и Гери Рувкун за нивното откритие на микроРНК, кои играат клучна улога во регулацијата на гените.
Нивните откритија помагаат да се објасни како настанал комплексен живот на Земјата и како доведуваат до создавање на различни ткива во човечкото тело.
Работата на двајцата научници откри сосема нов принцип на регулација на гените, кој се покажа како клучен за повеќеклеточните организми
МикроРНК влијае на тоа како гените се контролираат во организмите, вклучително и човечкиот.
Секоја клетка во човечкото тело содржи исти сурови генетски информации складирани во нашата ДНК. Меѓутоа, клетките на коските, кожата, срцето, нервните клетки, белите крвни зрнца и многу други го користат тој генетски код на различни, високоспецијализирани начини. Работата на американските научници објаснува како тоа се случува.
„Нивното револуционерно откритие покажа потполно нов начин на регулирање на гените што се покажа како клучно за повеќеклеточните организми, меѓу кои се луѓето. Сега е познато дека човечкиот геном кодира повеќе од илјада микроРНК“, објави шведскиот комитет за доделување на Нобеловата награда.
„МикроРНК е фундаментално важна во развојот и функционирањето на организмите. Клетките и ткивата не се развиваат нормално без микроРНК. „Доколку генската регулација тргне наопаку, тоа може да доведе до сериозни болести како што се рак, дијабетес или да предизвика автоимуни нарушувања“, се наведува во соопштението.
Виктор Амброс е професор по природни науки на Медицинскиот факултет на Универзитетот во Масачусетс, додека Гери Рувкун е професор по генетика на Харвард. Победниците ќе поделат парична награда од 965.000 евра, пишува „Би-Би-Си“.
