Неплодноста погодува еден од шест парови ширум светот, се наведува во неодамна објавениот извештај на Светската здравствена организација (СЗО). Во земјите со високи приходи, неплодноста влијае на 17,8 отсто од возрасната популација, а во земјите со низок и среден приход оваа бројка е 16,5 отсто.
Генералниот директор на СЗО, Тедрос Аданом Гебрејесус, вели дека извештајот покажува дека неплодноста влијае на сите делови од општеството.
„Односот на луѓе погодени од неплодност укажува на потребата да се обезбеди пристап до третман во што поголема можна мера и дека овој проблем повеќе не е на маргините кога станува збор за научно истражување и здравствена политика со цел да се обезбеди безбеден, ефективен и пристапен начин да се реализира родителство за оние кои тоа го сакаат“, рече шефот на СЗО.
Што всушност е неплодност?
СЗО ја дефинира неплодноста како болест на машкиот или женскиот репродуктивен систем поради неуспехот жена да забремени по 12 или повеќе месеци од редовен незаштитен однос.
„Ова може да предизвика ментална болка, стигма и финансиски проблеми и да влијае на менталната и психосоцијалната благосостојба“, соопштува СЗО.
СЗО го заснова својот извештај на 133 од 12.000 истражувања спроведени ширум светот од 1990 до 2021 година.
