Европа бележи зголемување на бројот на заразени со ешерихија коли (E. coli) отпорна на постоечките антимикробни лекови, покажуваат податоците на Европскиот центар за контрола и превенција на болести (ECDC), од каде што предупредуваат дека станува збор за „брзо ширење“ на инфекцијата.
Земјите-членки на Европската унија (ЕУ) и Европската економска област (ЕЕА) пријавија „зголемен број на изолати на E. coli кои го носат генот blaNDM-5, што ги прави отпорни на карбапенеми“, објави ECDC во средината на мај.
„Карбапенемите се антибиотици со широк спектар „кои се користат како последно средство за лекување на потешки облици на инфекции со ешерихија коли“, соопшти ECDC, предупредувајќи дека соевите на бактерии кои носат blaNDM-5 се „веќе воспоставени“ и „претставуваат нова закана“ со оглед на тоа што можат да бидат отпорни на други антибиотици, вклучително и аминогликозиди, флуорокинолони и триметоприм-сулфаметоксазол.
E. coli е најчестата причина за инфекции на крвотокот и уринарниот тракт во Европа, објави ECDC.
Истражување од март на научници од САД укажува на зоонотската E. coli која се пренесува преку храната и предизвикува половина милион инфекции на уринарниот тракт годишно.
ECDC, агенцијата на ЕУ чија цел е да ја зајакне одбраната на населението во Европа од заразни болести, тврди дека сојот отпорен на антимикробни лекови веројатно е поврзан со земјите во Африка и Азија.
Тврдењето го заснова на информации за патувањата и хоспитализации на поединци. Тие укажуваат дека повеќе од 80 проценти од случаите на инфекција би можеле да потекнуваат од области надвор од Европа.
Агенцијата препорачува дополнително зајакнување на мерките за рано откривање на инфекцијата и нејзина контрола и посочува дека ширењето на резистентниот сој и меѓу здравствените институции може да го зголеми товарот што го чувствуваат здравствените системи низ Европа.
Имено, во европските земји годишно умираат повеќе од 35.000 луѓе како последица на инфекции отпорни на антибиотици.
„Сојот E. coli кој го носи генот blaNDM-5 се шири брзо и во поголем географски размер. Затоа постои ризик дека бројот на инфекции со E. coli отпорни на карбапенем ќе се зголеми во ЕУ/ЕЕА во рок од неколку години“, предупредуваат од ECDC.
