Летото носи подолги денови, сончево време, плажа… и комарци. И додека овие мали летечки инсекти за повеќето луѓе се само непријатност, за други кои имаат алергиски реакции, тие можат да бидат вистински кошмар!
За повеќето луѓе, убодот од комарец значи непријатно чешање. Нормалната реакција на убод од комарец вклучува црвен оток што чеша, се јавува во рок од неколку минути по убодот и може да се задржи и до десет дена.
Внимавајте на сериозните симптоми
Реткиот облик на алергија на каснување од комарец е системска реакција која се јавува во целото тело. Овој вид на опасна по живот реакција е почеста кај инсектите како што се пчелите и осите, но ако почувствувате кој било од следниве симптоми после убодот, мора веднаш да побарате лекарска помош:
- Осип
Ненадејно избувнување на бледо-црвен осип кој чеша, а се појавува во пределот на убодот или по целото тело, може да укажува на алергиска реакција.
- Отечени усни, оток во усната шуплина или грло
Какво било нагло отекување во наведената област може да биде знак на сериозна алергиска реакција.
- Гадење
Ако одеднаш почувствувате мачнина, гадење, тоа може да биде уште еден симптом на сериозна реакција.
- Вртоглавица
Чувство на конфузија во главата и нестабилност во нозете може да укаже на системска алергиска реакција.
- Зголемена температура
Покачената температура е знак дека вашето тело се бори против алергија.
- Главоболка
Сериозна главоболка што се појавува одеднаш може да значи дека имате алергиска реакција.
