ПИШУВА:
Катерина Шекеровска-Димовска
katerina@pedijatar.mk
Со поздравен говор на претседателката на Здружението на приватни аптеки на Република Северна Македонија, м-р фарм. Џоана Андоноска, денеска во хотелот „DoubleTree by Hilton“ во Скопје и официјално беше отворен Третиот симпозиум „Аптекарска здравствена заштита“ – Смарт фармацевт, модул 3, посветен на хипертензија, дислипидемија и обезност.
„Ми претставува огромна чест и задоволство да ве поздравам и да го отворам овој симпозиум, кој веќе стана традиција и значајна платформа за размена на знаење, искуства и најнови сознанија во областа на фармацевтската грижа. Симпозиумот ја потврдува нашата посветеност кон континуираната едукација и унапредување на аптекарската пракса“, истакна м-р фарм. Андоноска пред преполната сала во хотелот „DoubleTree by Hilton“.
Аптеките се прва точка на контакт за многу пациенти, а фармацевтите сè повеќе се препознаваат како суштински дел од мултидисциплинарниот пристап во третманот на овие заболувања
– М-р фарм. Џоана Андоноска
Хипертензијата, дислипидемијата и обезноста се меѓу најсериозните здравствени проблеми на денешницата, поврзани со зголемен ризик од кардиоваскуларни заболувања, мозочен удар, дијабетес тип 2 и други хронични состојби. Овие состојби често се јавуваат заедно, што претставува сериозен здравствен предизвик и ја нагласува важноста на интегриран пристап во нивниот третман. Фармацевтите, како дел од здравствениот систем, играат клучна улога во раната идентификација, советување и управување со терапијата за овие состојби.
Токму затоа фокусот на Третиот симпозиум е ставен на протоколите за управување со терапијата кај хипертензија, дислипидемија и обезност, со цел унапредување на компетенциите на аптекарите и зајакнување на нивната улога како клучни здравствени работници. Тие се значајни советници и партнери на пациентите, обезбедувајќи стручна поддршка во оптимизацијата на терапијата и унапредувањето на здравствените исходи.
„Како здравствени професионалци, нашата улога во нивната превенција, рано откривање и правилно менаџирање е од клучно значење. Аптеките се прва точка на контакт за многу пациенти, а фармацевтите сè повеќе се препознаваат како суштински дел од мултидисциплинарниот пристап во третманот на овие заболувања. Затоа, преку овој модул ќе имаме можност да продлабочиме знаења, да размениме искуства и да дискутираме за најдобрите практики во аптекарската здравствена заштита“, додаде м-р фарм. Андоноска.
Смарт фармацевт 3 е продолжение на проектот Смарт фармацевт, кој Здружението на приватни аптеки, во соработка со меѓународната агенција „PharmaExpert“, го започна во 2023 година. Овој проект има едукативен карактер и се заснова на европскиот концепт на структурирана и стандардизирана фармацевтска грижа, континуиран професионален развој и проширување на компетенциите и вештините на фармацевтите.
Коавтор и носител на програмата Смарт фармацевт е доц. д-р Аријана Мештровиќ, која е потпретседателка на Академската секција и членка на Комитетот за фармацевтска пракса во FIP, како и меѓународна експертка и консултантка на Светската здравствена организација (СЗО). Таа е главен едукатор и модератор на дводневните интерактивни работилници на симпозиумот во Скопје, кои вклучуваат практични вежби за решавање на реални случаи од аптекарската пракса.
„Нашата заедничка мисија е да обезбедиме квалитетна фармацевтска грижа за нашите пациенти и да ја унапредиме улогата на фармацевтите-аптекари како значајни чинители во здравствениот систем. Нашето мото е „ЗАЕДНО СМЕ ПОСИЛНИ“ во грижата за нашите пациенти!“, истакна м-р фарм. Џоана Андоноска, претседателка на ЗПАРСМ.
Третиот симпозиум „Аптекарска здравствена заштита“ – Смарт фармацевт, модул 3, посветен на хипертензија, дислипидемија и обезност продолжува и во наредните два дена, кога се предвидени повеќе предавања посветени на препознавање и управување со проблемите поврзани со лековите, фармакоекономијата, лабораториските анализи, а во фокусот ќе бидат и адјувантната терапија и рационалната фармакотерапија, презентирани од водечки експерти од областа. Третиот и последен ден (недела) ќе биде посветен на најновите протоколи за третман на хипертензија, дислипидемија и обезност, а ќе се одржи и панел-дискусија за холистички пристап во нивниот третман.
