Речиси секоја соба во домот има потенцијално опасни предмети, вклучително и некои на кои можеби никогаш нема да помислите, пренесува „Инсајдер“, кој решил да поразговара со неколку педијатри за тоа како ги обезбедувале своите домови кога добиле деца, односно кои предмети никогаш не ги држеле во својот дом.
„Дури и кога мислите дека сте направиле навистина добра работа за да го заштитите домот за децата да не се повредат, тие сепак можат да најдат начини да го направат тоа, па затоа е многу важно да бидете внимателни“, објаснува д-р Крупа Плејфорт, педијатар од Вирџинија и мајка на две деца.
Имено, постојат работи кои педијатрите никогаш не би ги имале во својот дом, а тоа се следните потенцијални опасности:
- незаштитени базени, прозорци и фиоки со лекови,
- нестабилен голем мебел,
- голем телевизор кој не е монтиран на ѕид,
- ролетни кои имаат долги жици,
- огради и кадифени играчки во креветчето на бебето,
- незаштитени плакари со потенцијално опасни предмети како што се средства за чистење, ножеви и детергенти,
- незаштитени штекери,
- проодувалки за бебиња.
Како што објаснуваат педијатрите, секоја од овие работи претставува потенцијален ризик од повреда.
