Нарушувањето на вниманието и хиперактивност (АДХД) е хронично невроразвојно нарушување кое предизвикува децата често да не можат да се фокусираат на одредени задачи и да се однесуваат импулсивно. Според клиниката „Мајо“, оваа состојба погодува милиони деца и често продолжува во возрасна доба. АДХД вклучува комбинација од различни проблеми како што се потешкотии во одржување на вниманието, хиперактивност и импулсивно однесување.
АДХД вклучува комбинација од различни проблеми како што се потешкотии во одржување на вниманието, хиперактивност и импулсивно однесување
Децата со АДХД исто така може да имаат и проблеми со ниска самодоверба, проблематични односи со врсниците и лош успех на училиште. Симптомите понекогаш се намалуваат со годините. Сепак, некои луѓе никогаш во потполност не ги надминуваат симптомите на АДХД. Со оглед на тоа дека се работи за хронична состојба, ова нарушување не може да се излечи, но одредени лекови и интервенции во однесувањето можат многу да помогнат во ублажувањето на симптомите.
Психолозите нагласуваат дека раното препознавање на симптомите на АДХД кај децата е исклучително важно за да им се овозможи што полесно да функционираат во општеството. Токму затоа е многу важно да се реагира навреме веќе при појавата на раните симптоми, кои го вклучуваат следново:
- невнимание,
- импулсивност,
- хиперактивност.
Примарни карактеристики на АДХД вклучуваат невнимание и хиперактивно-импулсивно однесување. Симптомите на АДХД почнуваат пред 12-годишна возраст, а кај некои деца се видливи уште на тригодишна возраст. Симптомите на ова нарушување може да варираат, па кај некои деца тие можат да бидат благи, додека кај други деца се нешто потешки. Исто така, многу студии покажуваат дека АДХД почесто се јавува кај момчињата отколку кај девојчињата.
