Вошките и гнидите се многу чести кај малите деца и нивните семејства. Тие не се резултат на нечиста коса и се пренесуваат со директен контакт глава со глава.
Вошките може да предизвикаат чешање на главата. Единствениот начин да бидете сигурни дека некој има вошки е да пронајдете живи вошки. Ова можете да го направите со чешлање на косата со специјален чешел со фини запци (чешел за откривање вошки).
Како да ги препознаете вошките
Вошките се мали инсекти што се хранат со крв од човечкиот скалп. Тие најчесто ги „напаѓаат“ децата. Вошките обично се пренесуваат со директен контакт коса на коса
Како да се ослободите од вошките
Штом ќе забележите вошки, веднаш започнете со третманот. Нема потреба да посетите лекар. Проверете ги сите членови на семејството и лицата со кои сте во близок контакт и почнете со третманот кај сите што имаат вошки во ист ден.
Вашето дете не треба да изостанува од училиште поради вошки. Исто така, не е потребно перење на облеката и постелнината на висока температура.
Мокро чешлање
Вошките и гнидите може да се отстранат со мокро чешлање. За ова ќе ви треба специјален чешел со фини запци.
Најчесто, процедурата се изведува на следниот начин:
- Измијте ја косата со обичен шампон.
- Нанесете голема количина регенератор (може кој било).
- Чешлајте ја целата коса од коренот до врвовите со чешелот за вошки.
Родителите треба редовно да ја прегледуваат косата на своите деца, особено ако во училиштето има пријавени случаи
Чешлањето обично трае околу 10 минути за кратка коса и 20-30 минути за долга, густа или кадрава коса. По завршувањето, повторете го чешлањето уште еднаш.
Мокрото чешлање треба да го направите на 1, 5, 9 и 13 ден за да ги отстраните новоизведените вошки. Повторно проверете ја косата на 17 ден за да бидете сигурни дека нема вошки.
Вошките се движат со лазење, но не можат да скокаат или да летаат. Најчесто се пренесуваат со директен контакт глава со глава, особено во семејството или меѓу деца кои се во близок контакт на училиште или при играње. Според клиниката Мајо, поретка е можноста вошките да се пренесат без директен контакт, но сепак, може да се случи преку лични предмети, како што се: капи и шалови, четки и чешли, додатоци за коса, слушалки, перници, пешкири и тапациран мебел
Медицински лосиони и спрејови
Ако мокрото чешлање не помогне или не е соодветно, можете да пробате со медицински лосион или спреј. Овие производи ги уништуваат вошките во сите типови коса.
Вошките обично умираат во рок од еден ден. Некои производи доаѓаат во пакет со чешел за отстранување на мртвите вошки и гниди. Некои третмани треба да се повторат по една недела за да се уништат новите вошки што се изведени од преостанатите гниди.
Проверете го упатството за да бидете сигурни дека производот е безбеден за вас или за вашето дете и како правилно да го користите. Ако лосионите или спрејовите не делуваат, консултирајте се со фармацевт за други можни третмани.
Третмани што не се препорачуваат
Некои третмани не се препорачуваат бидејќи најчесто не се ефикасни. На пример:
- Производи што содржат перметрин.
- „Репеленти“ за вошки.
- Електрични чешли за вошки.
- Третмани со растителни масла како чајно дрво, еукалиптус и хербални лекови со масло од лаванда.
Не постои сигурен начин за спречување на вошки
Не постои метод со кој ќе се превенира појавата на вошки. Сепак, можете да го спречите нивното ширење со редовно мокро чешлање и користење чешел за вошки за рано откривање.
Не користете медицински лосиони или спрејови како превенција од вошки, бидејќи тие можат да предизвикаат иритација на скалпот, пишува NHS.
